Accessibility links

якшәмбе, 4 декабрь 2016, Казан вакыты 03:08

Ukraina: dönya äflisün-zäñgär koalisiägä reaksiä belderä


Ukrainanıñ Yuğarı Radası bügen Viktor Yanukoviçnı premyer-ministr urınına raslar dip kötelä. Prezident Viktor Yuçenko, anıñ belän kileşü tözegändä, Ukrainanıñ töp yünäleşe Könbatışqa taba bulaçaq, dip ışandırğan ide. Qayberäwlär Ukrainada 4 ayğa suzılğan säyäsi nizağ çişelde dip sanasa, başqaları – äflisün-zäñgär tösle koalisiä tözüne – xiyänät dip bäyäli.

İke doşman säyäsi xezmättäşlekkä äzerlängän çaqta – Ukrainanıñ ber deputatı "soñ ikeseneñ dä iseme Viktor bit – alar älbättä bergä eşli alaçaq" dip şayartqan ide. Xalıq xökümätneñ nixayät eşli başlawına ömet itä.

3 avgust könne ike Viktor "universal" dip atalğan milli berdämlek turındağı deklarasiägä qul quydı. Şul uq könne jurnalistlar aldına çığıp, Yuçenko, könçığış häm könbatış ukrainnarnı qayğırtu öçen urtaq fikergä kilergä kiräk ide, dip belderde:

"Küz aldığızğa kiteregez, ägär dä Äflisün inqilabı premyer-ministr urınına üz keşesen quysa – könçığış Ukrainada yäşäwçe xalıq öçen bu ğadel bulmas ide. Kemneñder maqsatları bik zur häm alar Ukraina yazmışın xäl itä belä kebek, ämma dilbegä alar qulına birelmi."

Milli Berdämlek Universalı dip atalğan kileşüdä Ukrainanıñ Yevropa Berlege, NATO häm Dönya Säwdä Oyşmasında äğzalıqqa taba baruı küzdä totıla. Şulay uq reformalarnı däwam itü häm korrupsiägä qarşı köräş wäğdä itelä.

Könçığış Ukraina öçen taşlama yasalğan – Rusiä yaqlı bu töbäktä ukrain tele belän ber rättän rusçanı da räsmi däwlät tele itergä röxsät birelgän. Bu täqdimnärneñ älegä qanuni nigeze yuq. Ägär dä Yuçenkonıñ Bezneñ Ukraina belän Yanukoviçnıñ Regionnar Partiäse – koalisiä tözü turında kileşsä – deklarasiädäge maddälär – qanuni bulaçaq.

Koalisiägä Yulia Tymoşenko blogı kermiäçäk. Deklarasiäne ul "buş dokument" dip atap qağäzgä qul quyudan baş tarttı.

"Minem öçen, bu deklarasiä – elekke köçlär aldında çigen häm prezident Kuçma çorına kire qaytu belän tiñ."

Ukrainanıñ könçığışı, üz keşeläre bulğan Yanukoviçnıñ Äflisün İnqilabınnan soñ tar-mar itüdän xäzer yañadan kütärelüen xuplap qarşı aldı.

Regionnar partiäseneñ Xarkov bülekçäse räise urınbasarı Lyubov Çub:

"Prezidentqa bu qararnı qabul itü bälki awır bulğandır. ämma ul aqıllı adım yasadı. Saylawaldı kampaniäse – ber äyber. Ämma Ukrainağa – tarqalu yanağanda, säyäsi ambisiälär häm qarşılıqlarğı çitkä quyıp, alğa taba barırğa häm qararlar qabul itergä kiräk, bez Yuçenkonıñ bu adımın xuplıybız."

Ukrainanıñ könbatışında qayberäwlär üzlären aldanğan kebek xis itä. Yuçenko, üzen saylağan keşelärgä xiyanät itä, dip sanıy.

Ukrainadan çittä – säyäsätçelär Ukrainada kileşügä ireşelgänne xuplap qarşı aldı. AQŞ Däwlät Departamentı 3 avgust könne Yanukoviç belän eşlärgä äzer buluı turında belderde. Yevropa Komissiäse dä nizağnıñ çişelüen xupladı. Rusiä älegä üz fikeren beldermäde, ämma bu kileşü Mäskäwgä oşar dip farazlap bula. Yanukoviç Rusiä Ukrainanıñ strategik partnerı bulıp qala, ämma iñ möhime – ilneñ berdämlege, dide.

Alsu Qormaş
XS
SM
MD
LG