Accessibility links

якшәмбе, 11 декабрь 2016, Казан вакыты 13:08

Leban BMO qararı ölgesenä üzgäreşlär kertergä teli


Lebanda bäreleşlär däwam itkän sürättä BMO İminlek Şurası alarnı tuqtatu yulların ezli. Uzğan atna axırında Fransiä belän Quşma Ştatlar bäreleşlärne tuqtatırğa çaqırğan qarar ölgese täqdim itte. Ämmä Leban häm başqa ğäräp illäre, bu dokumentqa İzrail ğäskärlären Lebannan çığaru taläbe kertelmägän dip, anı kire qaqtı.

Şimbä könne bäyän itelgän fransuz-amerikan ölgese ber ay çaması barğan bärleşlärne tuqtatu tırışlıqlarında ömet çatqısı bulıp kürengän ide. Ämmä Leban yağı anı "beryaqlı häm faydasız" dip atap şunduq kire qaqtı. Säbäbe – bu dokumentta İzrail ğäskärlären Lebannan çığaru kiräklege telgä alınmağan:

"Bezneñ töp taläp – bu ölgedä İzrail ğäskärlären Lebannan çığaru telgä alınmağan, äyterseñ alarğa qanuni tösmer birelä. İkençe yaqtan, bu qarşı toruçılarğa da basıp kerüçelärgä qarşı höcüm itergä xoquq birä. Häm bu wazğiätne ber dä ciñeläytmi" di Lebannıñ BMOdağı maxsus wäkile Näwhät Mäxmüt.

Fransiä belän Quşma Ştatlar äzerlägän ölgedä bäreleşlärne kiçekmästän tuqtatu taläp itelä. Monnan tış Lebannıñ könyağında bufer zona buldıru qaralğan. Älegä bu cirlär Hezbolla qaramağında. Kiläçäktä anda Leban ğäskärläre belän xalıqara köçlär urnaştıru täqdim itelä.

Ölgene äzerläwçelär anı fäqät berençe adım dip atıy. Quşma Ştatlar däwlät sekretare Codoleezza Rice häm Britan premier-ministrı Tony Blair anı tawışqa quyarğa çaqırdı.

Rusiäneñ BMOdağı wäkile Vitaly Çurkin Leban wä ğäräp citäkçelären ölgene yaxşılap öyränergä kiñäş itte. "Leban xökümäte häm bar Ğäräp dönyası ölgene centekläp uqısa, anda Leban faydasına küp närsä tabaçaq, iñ möxime anda bäreleşlärne tuqtatu taläbe bar" di Rusiä wäkile.

Ğäräp Ligası illäreneñ tışqı eşlär ministrları bügen Bäyrutta töbäktäge wazğiätne tikşerde. Kilgän xäbärlärgä qarağanda Leban qarar ölgesenä berniçä östämä kertergä teli. Şul isäptän, İzrail ğäskärlären Könyaq Lebannan çığarıp anda 15 meñlek Leban häm 2 meñlek xalıqara köçlär kertü täqdimen.

Lebannıñ qayber citäkçeläre İzrail törmälärendä utırğan Leban totqınnarın azat itü taläben dä kertergä täqdim itä.

Düşämbedä amerikan prezidentı George Bush Texastağı utarında däwlät sekretare Condoleezza Rice belän Yaqın Könçığıştağı wazğiätkä bağışlanğan matbuğat oçraşuı ütkärde. Bush İzrail-Hezbolla bäreleşlären tuqtatırğa, monıñ öçen BMO qararın mömkin qädär tizräk qabul itergä çaqırdı. Buş Hezbollanı töbäktäge krizisnıñ çığanağı dip atadı, häm monı bu qararda çağılış tabılırğa tieş dide. Rice Leban häm İzrail citäkçeläre belän söyläşkänen äytte. İke tarafnıñ da qarar ölgesenä qarata borçuları bar, alarnı iskä alırğa kiräk, monıñ öçen beraz waqıt kiräk bulaçaq dip östäde ul.

ali ğilmi
XS
SM
MD
LG