Accessibility links

шимбә, 10 декабрь 2016, Казан вакыты 15:51

Ukraina: Yanukoviçne premyer itü "tösle inqilaplar" kiläçägenä nindi tä''sir yasar?


Ukraina premyer-ministrı itep uzğan atna azağında Viktor Yanukoviç bilgelänü belän anda berniçä ayğa suzılğan säyäsi bilgesezlek äkrenläp betä başladı. Xäzer inde, Kievtäge soñğı xällär "äflisün inqilabı" tösle üzgäreşlär kiçergän Gruziä häm Qırğızstanğa, ğomumän, tirä-yündäge başqa illärgä nindi tä''sir yasıy ala digän soraw bik urınlı kürenä.

Kievtäge "äflisun inqilabı"nnan soñ, üze dä şundıyraq inqilap näticäsendä xakimiatkä kilgän Mixail Saakaşvili, Gruziä prezidentı, Ukraina başqalasında yış kürengäläsä dä, xäzer inde bu üzgärer tösle. "Äflisun inqilabı"nnan soñ barğan täräqqiat beraz başqaçaraq näticälärgä kiterde. Çınbarlıq xäzer şul ki, Ukraina premyer-ministrı bulıp mäydan qaharmanı yalqınlı Yuliä Timoşenko tügel, ä Viktor Yuçenkonıñ töp köndäşe Yanukoviç utıra. Ukrainada berniçä ayğa suzılğan xakimiat krizisı Yuğarı radanıñ uzğan atna azağında xökümät başlığı itep näq menä Viktor Yanukoviçne raslawı belän tämamlandı.

Elekke sovet cirlärendä berençe çiratta Könbatışnıñ demokratik täcribäsenä nigezlängän, Könbatıştağı yäşäw räweşen qabul itkän cämğiatlärne qoru tarafdarları öçen Ukrainadağı soñğı xällär närsäne añlata soñ? "Äflisun inqilabı" çorında Gruziäneñ tışqı eşlär ministrı bulğan, Tiflis belän Kiev arasında strategik xezmättäşlek urnaştıru eşenä zur öleş kertkän Salome Zurabaşvili bu sorawğa bolayraq cawap birä:

"Rusiä xäzer mondıy tösle inqilaplarnı kire borıp bula häm moña az ğına yardäm itü dä citä ikän digän näticägä kilä ala, häm şul küzlektän qarağanda Ukrainadağı soñğı täräqqiat Gruziä öçen naçar ber närsä. Şuña da xäzer Gruziäneñ bar tırışlıqları, üz xalqına, Rusiägä, dönyağa üzendäge üzgäreşlärneñ kire bormaslıq buluına ışandıruğa yünälderelergä tieş", di Salome Zurabaşvili.

Wäzğiatne salqınraq ğaqıl belän bäyälärgä tırışuçılar da bar. Washingtondağı Xalıqara häm Strategik tikşerenülär üzägendä Rusiä wä Yewraziä programmaların citäklägän Cory Welt, närsä genä bulmasın, bez xäzer Ukrainada näq menä demokratiäneñ ciñep çığuın küräbez, dip uylıy:

"Bez xäzer Ukrainada kürgän närsä ul küz aldına kiterä alırlıq iñ demokratik näticä bulıp tora. Şuña kürä, bu yaqtan qarağanda, anda berni dä üzgärmäde. Üzgärgän närsä şul ğına - alar monı, yäğni demokratik bulunı elek Könbatışqa qaraw belän genä bäyli ide. Minemçä, Ukrainada berkem dä bu ike närsäneñ hiçşiksez bergä baruın kötmäde dä", di Washingtondağı belgeç Cory Welt.

Şuşı fiker, yäğni Yanukoviçne premyer itep bilgeläwneñ näq menä demokratiä çağılışı buluı belän Qırğızstan parlamentı citäkçese urınbasarı İrken Alimbekov ta kileşä:

"Ukraina xalqınıñ yartısı diärlek Yanukoviçne yaqlıy häm anıñ säyäsi qaraşları anda şaqtıy populär. Yuçenko tösle inqilaplar tiräsendä uyınnar uynap tormadı, üzeneñ şäxsi, watandar häm prezident bulu wazifaların ğadi täkäbberlektän östen quyıp, säyäsi krizisnı xäl itü öçen Yanukoviçne premyer itep quydı - minemçä, bu bik ğadel häm döres qaraş", dip bäyäli Ukraina prezidentı Yuçenkonıñ üzeneñ elekke köndäşen xökümät başlığı urınına täqdim itüen Qırğızstan parlamentı citäkçeseneñ urınbasarı Alimbekov.

Mäğlüm ki, Gruziä häm Ukrainadan soñ xakimiatneñ xalıq kütäreleşe nigezendä almaşuı Qırğızstanda da bulğan ide.

Kärim Kamal
XS
SM
MD
LG