Accessibility links

чәршәмбе, 7 декабрь 2016, Казан вакыты 11:55

Hönäri belem birü mäsäläläre tikşerelde


Respublikanıñ mäğärif xezmätkärläre bu könnärdä üzläreneñ yıllıq avgust kiñäşmäsen ütkärü belän mäşğül. İnde äytkänebezçä, cıyılışnıñ töp öleşe 9-10 avgustta Täteş şähärendä uzaçaq. Sişämbe könne isä Qazanda kiñäşmäneñ ber seksiä utırışı uzdı. İdeyä texnoparkında cıyıluçılar respublikada hönäri belem birü mäs’äläsen tikşerdelär.

Bügenge cıyılışnıñ töp teması bulğan hönäri belem birü mäs’äläse Tatarstanda soñğı aralarda bik aktual’. Çönki soñğı aralarda iqtisat şaqtıy ğına üseş ala bara, sänäğät tarmağında eş arta bara. Läkin kiñäyä barğan eş bazarında eşlärgä keşe citmi xäzer Rusiädä. Eşçelärneñ urtaça yäşe dä arta bara. Çönki yäşlär mäktäptän soñ eşçe hönären alırğa tügel, yuğarı uqu yortlarına omtıla. Şul uq waqıtta, demografik wazğiät awırlaşa baru säbäple, ğomumän yäşlärneñ sanı da kimi bara.

Zavod, şirkätlärdä eşçelärneñ sanı kimü, citäkçelärne dä borçıy başladı. Şuña da, älege tarmaqqa xökümät däräcäsendä iğtibar arttı. Mäğärif xezmätkärläreneñ avgust kiñäşmäseneñ ber seksiäse hönäri belem birü mäs’äläsenä bağışlanu da şul iğtibarnıñ ber çağılışı. Cıyılışta çığış yasawçılar, ğädättägeçä, qaralğan temanıñ ähämiäte turında söyläde, ministrlıq häm xökümät tarafınnan eşlänelgän ğämällär xaqında söyläde. Kiñäşmäne alıp barğan Fän häm mäğärif ministrınıñ urınbasarı Stanislav Taraseviç, älege tarmaqqa byudjettan tış aqçalar kerä başlağanın äytte. Ä çığış yasağan Däwlät Şurası deputatı Marat Ğäliev isä, hönäri belem birü mäktäpläre wäkillärenä üzlärenä aqça tabarğa, eşmäkärlär, törle şirkätlär belän nığraq elemtägä kerergä täqdim itte. Ğomumän, aqıllı süzlär, döres täqdimnär küp yañğıradı monda. Läkin zalda utırğan törle hönäri mäktäplär wäkilläre, närsägä bezgä söylilär bolarnı, bez bit bu xaqta bolay da bik äybät beläbez, sez bit citäkçelär,sezdän tora, nik eşlämisez, dip utırdılar.

Kiñäşmäneñ tänäfesendä bez Çallı Texnik kolledjı direktorı Petr Kudryaşov belän söyläşep aldıq.

Hönäri belem birüçe mäktäplärgä iğtibar kübräk bulsın ide. Bu, berençe çiratta, finanslawnı kübäytü, aqçanı arttıru digän süz. Aqça bulsa, material’ nigezne dä yaxşırtıp ta, uquçılarnı cälep itep tä bula. İske cihazlarda zamança eşli torğan eşçene äzerlärgä mömkin tügel

Tatarstannıñ Fän häm mäğärif ministrı Räis Şäyxlislamov isä, hönäri belem birüçelärgä aqçanı üzlärenä dä eşlärgä kiräklegen iskärtte. Xäyer, ministr süzlärenä qarağanda, respublika xökümäte dä hönäri belem birü sistemasına yärdäm arttıra bara. Tatarstanda şuşı ölkädä maxsus programma da eşläp kilä ikän.

Ğomumän, ministr Räis Şäyxlislamov fikerençä, respublikada hönäri belem birü sistemasınıñ çişeläse problemaları şaqtıy. Ul belem birüneñ sıyfatın da, finanslawnı da, demografik xällärne dä iskä alıp kitte. Häm älege mäsällärne xökümät häm mäktäplär üzläre bergäläp xäl itärgä tieşlegen äytte.

Gölnaz İlgizär

XS
SM
MD
LG