Accessibility links

Кайнар хәбәр

Omski 290 yıllığın bäyräm itte


Uzğan yäkşämbe könne Omski xalqı şaw-gör kilep şähärneñ 290 yıllığın bäyräm itte. Bäyräm qanunnar çığaru cıyılışı qarşısındağı üzäk mäydanda şähär tarixına bağışlanğan teatrlaştırılğan küreneş belän başlanıp kitte. Annan tantana mädäniät yortlarına, mäydannarğa, yal parklarına küçte. Yal köne buluğa qaramastan xätta ölkä üzäk muzey da eşläde, ä anda kerü tüläwsez buldı. Muzey xezmätkärläre tarix temasına konkurslar, viktorinalar, uyınnar ütkärdelär. Ä Omskinıñ “Yäşel utraw” yal kompleksında zur külämdä “Duslıq taqıyası” dip isemlängän milli mädäniätlär festivale bardı. Anda milli-mädäni oyışmalar tarafınnan oyıştırılğan qul eşläre, yort-cir äyberläre, milli rizıqlar kürgäzmäläre eşläde. Üzeşçän sänğät kollektivları kön buyına cır-biyu belän xalıqnıñ küñelen kürdelär. Äytergä kiräk, xalıq tamaşa qılıp qına tormadı, milli mäydançıqlarda oyıştırılğan uyınnarda, konkurslarda qatnaştı, ğomumän küñel açtı. Tatar mäydançığında xalıq ayıruça küp buldı, aralarında milli kiem qalfaq, qomzol kiep kilgännäre dä bar ide.

Bäyräm barışında deputatlar, şähär başlığı häm bäyrämgä kilgän däräcäle qunaqlar milli kollektivlar belän tanışıp yördelär, milli rizıqlardan awız ittelär. Tatar mäydançığında küp sanlı qunaqlar belän şähär başlığı Viktor Şreyder, Däwlät Duması deputatı Oleg Smolin, Şähärneñ Lenin okrugı xakimiäte başlığı Vladimir Rarov häm başqalar buldılar. “Umırzaya” kollektivı qızları alarnı öçpoçmaq, pärämäç, göbädiä, çäk-çäk kebek tatar aşları belän sıyladılar.

Vladimir Rarov, bügenge bäyrämdä çınlap ta Omskida törle millät keşeläreneñ xalıq tarixın yolalarda, milli aşlarda, üz-üzlären totuda saqlap kilüläre sizelä,-dide.

Omski sportçıları 5 prizlı urın yauladı

Şähär bäyräme aldınnan ğına Anapa şähärendä boks buyınça Rusiä berençelegendä qatnaşqan sportçılar Omskiğa äylänep qayttılar. Vokzalda alarnı dusları, tuğannarı, xezmättäşläre, jurnalistlar qarşı aldı. Yäşüsmerlär arasında ütkärelgän Rusiä berençelegendä Omski komandası yaxşı uñışlarğa ireşep – öç altın häm ike kömeş medal' yaulap qayttı. 48 kilogrammğa qädär awırlıqta altın medal' yaulağan Azamat Aşenovnıñ trenerı millättäşebez Rafail Ğafarov.

Boks belän şöğellänüçelär arasında tatarlar da bar, küpläre sport masterları, kandidatları isemnärenä layıq buldılar,-di Ğafarov.

Sport belän şöğellänüçe balalar yalğış yulğa basmıylar, mindä tärbiälänüçelärneñ barsı da diärlek institutlarğa kerälär, ğomumän, tormışta üz urınnarın tabalar,-di balalar häm yäşüsmerlär belän eşläwçe Rafail Ğafarov.

Rozaliä Sayganova, Omskii

XS
SM
MD
LG