Accessibility links

шимбә, 10 декабрь 2016, Казан вакыты 06:12

“Tatarstan poçtası” araqı sata?


İyül ayına qädär härber cirdä araqı irken räweştä satıldı. Rusiä qanunına kertelgän üzgäreşlär barısın da çelpärämä kiterde. Çönki aksionerlıq cämğiät bulıp terkälergä citeşmägän eşmäkärlär bügen araqı sata almıy. Ä däwlät kibetläre yabılğaç näq şäxsi eşmäkärlär araqı belän säwdä itä başlağannar ide. Awılnı bötenläy araqısız qaldırmasqa dip yaña ısul tabılğan. “Kommersant” gäzite “Tatarstan poçtası” oyışması araqı satunı tağın da cäyelderäçäk dip yazıp çıqtı. Çınlıqta isä bu “Tatarstan poçtası” aksionerlıq cämğiäte qaramağında bulğan kibetlär ikän. Älege kibetlär respublikada 1998 yılda uq açılğan ide. Häm alarda törledän-törle azıq-tölek towarları satıla. Şul isäptän araqı da. Bu xaqta “Tatarstan poçtası” citäkçese Ol'ğa Kuznetsova

Bezneñ barlığı 58 kibetebez bar, şunıñ 24 alkogol' eçemleklär satıla. Ä çınlıqta kibetlärdä azıq-töleklär satıla. Bezneñ kibetlär häm kiosklar bar. Bez ayırım poçtada araqı satmıybız häm satarğa cıyınmıybız. Kiläçäktä cäyelderergä uylamıybız.

Ol'ğa Kuznetsova kiläçäktä bernindi yañalıqlar kötelmi, araqı näq xäzerge kebek respublikanıñ 10 şähäre häm 14 rayonında satılaçaq dip beldersä dä, “Kommersant” gazetası “Tatarstan poçtası” araqı satunı cäyelderergä isäpli dip yazıp çıqtı. Monı Tatarstan Xökümäte tä xuplıy dide. Şulay uq Tatarstannıñ Däwlät alkgol' inspeksiäse dä näq yıraq-qarañğı awıllarda araqını satu belän Tatarstan poçtası şöğellänäçägen äytte. Däwlät alkogol' inspeksiäse citäkçese urınbasarı Röstäm Arslanov

Awıllarda araqı satu öçen räsmi noqta kiräk. Çönki yalğan araqı satu kiñäyäçäk. Ä “Tatarstan poçtası”nıñ litsenziäse bar häm alar bezgä möräcäğät ittelär. Äle noqtaları az, ämma kiläçäktä alar 100дән artıq araqı satu urını açarğa uylıylar.

Älege mäs'älä buyınça “Azatlıq” radiosı “Tataspirtrom” oyışmasına da möräcäğät itte. Läkin älege oyışmada añlatma birüdän baş tarttılar. Şulay itep Tatarstan poçtası aksionerlıq cämğiäteneñ kiläçäktä araqı satuın cäyelderü-cäyeldermäwe bilgesez bulıp qala.

Landış Xarrasova

XS
SM
MD
LG