Başqortstan uqıtuçıları comğa könne üzläreneñ yıl sayın oyıştırıluçı avgust kiñäşmäsen ütkärä. Bıyıl bu cıyın respublikanıñ Nurimsan häm İglin rayonnarında uzaçaq. Şuşı ike kürşe rayonda älege kiñäşmädä qatnaşuçılarnı yaqtı yöz belän qarşılaw öçen küp eşlär başqarılğan. Bıyıl ike rayonda cämğısı 7 yaña mäktäp tözelep betkän. Comğa könne alarnı açu tantanaları da ütäçäk dip belderelde.
Uqıtuçılarnıñ avgust kiñäşmäse eşendä, här yıldağıça, respublika Prezidentı Mortaza Räximov, Däwlät Cıyılışı-Qorıltay räise Konstantin Tolkaçev, premyer-ministr Rafael' Baydäülätov häm başqa yuğarı citäkçelär dä qatnaşaçaq. Maxsus şuşı kiñäşmädä qatnaşu öçen, Ufağa Rusiä mäğärif ministrı Fursenqo äfände dä çaqırıldı. Ul comğa könne irtänge yaqta Başqortstan däwlät universitetında oçraşuda bulğannan soñ, respublika citäkçeläre ozatuında, avgust kiñäşmäse ütäçäk Nuriman häm İglin rayonnarına bara. Nuriman rayonı üzägendäge plenar utırış eşendä qatnaşıp, anda çığış yasarğa da tieş Mäskäw qunağı.
Bıyıl avgust kiñäşmäsendäge töp fiker alışular Rusiädä qabul itelgän Milli proyektlar qısalarında mäğärif ölkäsendä reformalar ütkärü xaqında bulır dip kötelä. Bıyıl uqu-uqıtu ölkäsendä zur uñışlarğa ireşkän uqıtuçılarğa “Mäğärif” milli proyektına yaraşlı 100-är meñ sum grantlar da birelä. Şuşı büläkkä iä buluçılar arasında tatar uqıtuçıları da baytaq. Bu aqçalar alarğa 1 sentäberdä – Belem könendä tapşırılaçaq.
Bıyılğı uqu yılında Başqortstan mäktäplärendä başqa törle reformalar niçek barır, älegä mäğlüm tügel, ä menä barlıq millätlär balalarına da mäcbüri töstä başqort telen uqıta başlaw kiñ qolaçlı tormışqa aşırıla başlayaçaq. Berençe sıynıftan 11 nçe sıynıfqaça härtörle millät balaları başqort telen motlaq öyränergä tieş bula. Älegä bu başlanğıçqa qarşılıq süzdä genä bulsa, ruslar häm başqa millätlär arasında üz balaların köçläp başqortça uqıta başlawğa rizasızlıq uqu yılı başlanıp küpmeder waqıt ütkäç, kiskenläşer, digän farazlar bar.
Başqortstan mäktäplärendä başqort telen mäcbüri uqıta başlaw ayıruça tatar cämäğätçelegen nıq borçıy. Bu ğämälgä rizasızlıq belderep, Başqortstan tatar milli oyışmaları qayber çaralar oyıştırdı häm törle däräcä citäkçelärgä möräcäğätlär dä qabul itte. Ämma Başqortstan citäkçelege yaqlawın alğan respublika Mäğärif ministrlığı türäläre üzläre başlağan eştän waz kiçmäs häm ata-analar yağınnan nindi genä rizasızlıqlar bulsa da, başqort telen kiñküläm öyrätä başlawnı cäyelderer kebek.
Bu eş tatar mäktäplärenä häm tatar gimnaziälärenä dä qağılaçaq. Ufada ike tatar gimnaziäse bar. 65 nçe sanlı tatar gimnaziäsendä äle ike yaña bina tözelep betep kilä. 1нче sentäbergä alarnı açu tantanalı şartlarda ütäçäk dilär.
84 nçe sanlı tatar gimnaziäsendä tözeleş eşläre alıp barılmadı. Anıñ binası nıqlı häm zur. Anda cäy köne tieşle tözekländerü, maturlaw eşläre genä başqarılğan. Bıyıl gimnaziädä balalarğa başqort telen dä uqıta başlawğa uqu yortı direktorı Ramilä Xäyrullina älläni xafalanu beldermäde. “Atnağa ike-öç säğät başqort telen öyränüdän bezneñ uqıtu protsessına zur xıyan kilmäyäçäk, başqort telen uqıtu tatar däresläre xisabına alıp barılmayaçaq”. – di Ramilä xanım.
Ramilä – Bezneñ gimnaziädä barlığı 89 uqıtuçı belem birä. Alar barısı da yuğarı kategoriäle uqıtuçılar. Bıyılğı uqu yılına da bik yaxşılap äzerländek. Bıyıl berençe sıynıfqa 90га yaqın bala kiläçäk dip kötäbez. Bezdä tatar tele häm ingliz tele tiränten öyrätelä. Barlıq mömkinleklär dä bar uqırğa da, törle sälätlärne üsterergä dä.
Ufadağı 84 nçe sanlı tatar gimnaziäse direktorı Ramilä Xäyrullina fikerläre buldı.
Şulay itep comğa könne Başqortstan uqıtuçıları üzläreneñ yıl sayın ütä torğan respublika avgust kiñäşmäsenä cıyıla. Anda respublikanıñ iñ yuğarı citäkçeläre häm Mäskäwdän kilgän qunaq – Rusiä mäğärif ministrı Fursenqo äfände dä qatnaşaçaq.
