Accessibility links

шимбә, 10 декабрь 2016, Казан вакыты 06:13

Blagoveçen xällären tikşerügä Rusiä prokuraturası da quşıla


Başqortstannıñ Blagoveşçen şähärendä 2004 yılnıñ dekaberendä militsiä häm OMON tarafınnan ütkärelgän maxsus operatsiä häm anda qaza kürgän yözlärçä keşeneñ şiqayätläre buyınça barğan mäxkämä xaqında äledän-äle xäbär itep torabız. Bügen Başqortstan prokurorı Sergey Xurtin Ufada ütkärgän matbuğat oçraşuında Blagoveşçendağı xällärne tikşerüdä mäxkämä eşen ikegä ayıruğa kisken qarşı buluın belderde.

Mäğlüm buluınça, Blagoveşçen şähäre mäxkämäse bu eşne tikşerüne törle säbäplär belän suza kilde häm axırda militsiä xezmätkärläre faydasın qayırğan qararlar çığardı. Şulay da, Başqortstan Yuğarı mäxkämäsendä bu eş centekle tikşerelgännän soñ, militsiä belän dömbäsläşü kiterep çığarğan dip isäplängän öç ir-atnıñ ğäyepsez buluı açıqlandı.

Annan soñ bu eş yañadan Blagoveşçen şähäre mäxkämäsenä qaytarıldı. Şul uq waqıtta Başqortstan Yuğarı mäxkämäsendä Blagoveşçen şähärendäge waqiğalarda ğäyeple dip isäplängän militsiä xezmätkärläre häm alarnıñ citäkçese İldar Ramazanov östennän mäxkämä eşe däwam itte.

Şul arada Blagoveşçen şähäre mäxkämäse bu eştä Blagoveşçen şähäre Eçke eşlär idäräse başlığı İldar Ramazanov belän Başqortstan Eçke eşlär ministrlığınıñ maxsus täğäyenläneştäge köçläre komandirı urınbasarı Oleg Sokolovqa qarata açılğan mäxkämä eşen ayırım tikşerüne sorap, Başqortstan prokuraturasına möräcäğät itkän ide. Ämma prokuratura monıñ belän kileşmiçä, BR Yuğarı mäxkämäsenä möräcäğät itte. Prokuratura wäkilläre äytüençä, Blagoveşçen şähäre mäxkämäse törle yullar belän bu mäxkämä eşen tikşerüne häm ğäyeple militsiä citäkçelären xökem itüne maxsus suzarğa tırışa.

Şulay da Başqortstan Yuğarı mäxkämäse respubliqa prokuraturası möräcäğäten kire qaqtı. Prokuratura wäkilläre isä bireşergä uylamıy. Başqortstan prokurorı Sergey Xurtin bügen uzğan matbuğat oçraşuında Başqortstan Yuğarı mäxkämäse qararın kire qağıp, Rusiä baş prokuraturasına möräcäğät itüen äytte.

“Blagoveşçendağı waqiğalarğa döres-xaq bäya barıber bireläçäk häm ğäyeple militsiä xezmätkärläre häm alarnıñ citäkçeläre tieşle cäzasın alaçaq”, - dip belderde Sergey Xurtin.

XS
SM
MD
LG