Başqortstanda bıyıl Salawat Yulaev isemendäge däwlät bülägenä däğwä itüçelär arasında kürenekle tatar rässamı, Başqortstannıñ atqazanğan rässamı Rinat Xarisov ta bar. Soñğı yıllarda şuşı yuğarı büläkkä täqdim itelüçelär arasında Başqortstan tatarları bik siräk bula torğan ide. Şuña kürä dä respublika tatar cämäğätçelege bu xälne xuplap qarşı aldı.
Salawat Yulaev isemendäge büläkkä Rinat äfände üzeneñ tatar xalıq fol'klorına nigezlänep icat itelgän küp sanlı soqlanğıç kartinaları öçen täqdim itelde. Rinat Xarisovnıñ üzençälekle häm talantlı icatı küplärgä tanış. Üzeneñ yegermegä yaqın şäxsi kürgäzmäsen oyıştırğan häm distälärçä kümäk kürgäzmälärdä qatnaşqan tatar rässamı yartı yıldan artıq Avstriädä dä eşläp häm icat itep qaytqan ide.
Rinat äfändeneñ icat cimeşläreneñ hämmäse dä milli ruxlı dip äytergä mömkin. Tatar xalqınıñ tarixı, anıñ canğa yaqın ğöref-ğadätläre, yolaları talantlı rässamnıñ här äsärendä çağılış tapqan. Şuña da anıñ näq menä şul yünäleştäge kartinalarınıñ Başqortstan Respublikasınıñ Salawat Yulaev isemendäge däwlät bülägenä täqdim itelüe tabiği dä.
Rinat Xarisov unbiş yıldan artıq inde Ufadağı «Çıñğız xan» tatar rässamnarı icat berläşmäsendä äğza bulıp tora. Utız yılğa yaqın Başqortstan däwlät pedagogiä universitetınıñ xudojestvo-grafiqa fakul'tetında taliplarğa belem birä ul. Dotsent däräcäse alğan möğallimne biredä dä bik yaratalar. Şundıy kierenke uqıtuçılıq eşe östenä Rinat äfände ilhamlı icat eşenä dä waqıt taba.
Äle üzeneñ Salawat Yulaev isemendäge däwlät bülägenä täqdim ielüe uñayınnan Ufada jurnalistlar belän oçraşu ütkärde talantlı tatar rässamı. İcatındağı töp üzençälek dip xalıqçanlıqnı atıy ul. Milli fol'klorğa, xalıq yolalarına tayanıp icat itüne üzeneñ ğömerlek maqsatı buluı xaqında äytä Rinat äfände.
Başqortstandağı tanılğan tatar rässamı, 2006 yılğı Salawat Yulaev isemendäge däwlät bülägenä däğwä itüçe Rinat Xarisov buldı bu. “Başqortstannıñ atqazanğan rässamı” isemenä layıq bulğan talant iäse kürgäzmäläre Başqortstan şähärlärendä, şulay uq Qazanda, Mäskäwdä, Sankt-Peterburgta häm Avstriädä oyıştırılğan ide. Anıñ surätläre Ufa, Mäskäw, Qazan, Avstriä, Germaniä muzeylarında häm çit illärdä yäşäwçelärneñ şäxsi tuplanmalarında saqlana.
Fänis Fätxi, Ufa
