Accessibility links

җомга, 9 декабрь 2016, Казан вакыты 08:46

Tatarstanda “Uñış - 2006” baramı, çabamı?


Tatarstanda urtaça uñış gektarınnan 27,7 sentner çığa dip xäbär itä awıl xucalığı häm azıq - tölek ministrlığı. Bu kürsätkeç här yıldağıça Nurlat, Zäy, Baltaç, Bua, Çüpräle, Aqtanış yaqlarında yuğarıraq ikän. Nurlatta 2,5 – 3 märtäbä kübräk, urını belän gektarınnan 50 sentnerğa da citä di. Zäydä dä 40 belän 50 arasında tibrängän urınnar barlığı işetelde. Zäylelär barlıq çäçülek mäydanınıñ 40 protsentın urıp-suğıp alğannar bulıp çıqtı. Alar däwlätkä 60 meñ tonna ikmäk tapşırmaqçı bulalar. Nurlat ğomumän üzläreneñ rayon qırlarınnan 200 meñ tonna aşlıq suqtırmaqçılar. Respublikanıñ räsmi basmaları Nurlatqa Tatarstanda ğına tügel, İdel buyı federal' okrugında da tiñnär yuq dip yazalar. Bügen Tatarstanda 368 meñ gektarda urıp-cıyu eşläre başqarılğan, bu barlıq mäydannıñ 23 protsentı ikän. Qışın 40 graduslı suıqlar, cäyen ber qızdırıp, kipterep alğan annan cebetep ağızırlıq hawa torışı buluğa qaramastan, bıyıl uñış 1,4 sentnerğa yuğarıraq dip xäbär itä awıl xucalığı ministrlığı wäkilläre. İñ tübän kürsätkeçle rayonnar isemlegenä Ägerce, Minzälä, Alabuğa kergän. Bolar äle äytelgännäre, äytelmägännäre küpmeder. Kürsätkeçläre tübän bulğanğadırmı Alabuğa rayonında “Uñış - 2006” kisätü operatsiäsen başlap cibärgännär. Bu operatsiäneñ maqsatı, qır belän ambar, elevator arasında çabuçı yök maşinalarınıñ uñğa-sulğa suğılmıyça yörülären tä'min itü. Yağulıq-maylaw materialların, uñış cıyu texnikası zapçast'lären urlawğa yul quymaw. Qaraqlar totılğan oçraqta ştraf birü, cinayät eşe quzğatu eşläre dä qaralğan. Läkin ul kisätü operatsiäläreneñ näticälege bulsa yarıy inde. “Uraq waqıtında niätendä urlaw teläge bulsa barıber urlıy inde ul anı ”– digän awıl abzıyınıñ süzläre iskä töşä. “Alay disäm urlarlıq äyberdä yuq inde xäzer, qır tulı äremne urlap bulmıy bit inde” -dip tä quyğan ide ul. Menä Zäy rayonı igençeläre urlamıy torğandır inde. Anda uraq waqıtında ayına ber igençe 40 meñlek eş xaqı ala ikän. Ayırım alğanda “Vostok” agroşirkätendä, anıñ sponsorı “Tatfondbank” açıq aksionerlıq cämğiäte. Urıp-cıyu texnikası eşlägän här qırğa remont brigadası quyılğan. Kombaynerlarğa käräzle telefonnarı birelgän, kombayn watılıp tuqtasa, igençe remont brigadası avtobusına telefonnan şaltırata da şunduq kilep citep minut eçendä tözätep tä kitälär. Monda “Niva” kombaynnarı tügel inde, ä çit ilnekelär suğa. Çit il kombaynnarı, şuşındıy uñaylıqlarnı Balıq bistäse igençeläre töşlärendä dä kürgännäre bulmadı. Xäzer alarnıñ kübese qulına balta totıp şabaşqa çığıp kittelär, yäki öydä mal simertälär, kombayn cene qağılğannarı kolxozlar taralğanda iske “Niva” kombaynın arzan bäyägä eläkterep qaldılar. Xäzer şul “Niva”nı çöyläp bulsa da eşlätep: “Qışın mal-tuarnı tuydırırlıq bulsa da eşläsäm yarap torır” - dip fermerlarnıñ qırların suğıp mataşalar. Ä bu könnärdä ber törkem yazuçılar Mamadış rayonınıñ igen qırlarınnan, aşlıq ambarları, игенчеләр arasınnan ilham ezläp yörgännär. Mamadışnıñ spirt zavodına ekskursiä yasağannar. Röstäm İsxaqi

XS
SM
MD
LG