Accessibility links

дүшәмбе, 5 декабрь 2016, Казан вакыты 17:41

Uqıtuçılarnıñ awgust kiñäşmäse tämamlandı


Bıyılğı avgust kiñäşmäse tatarstannıñ Täteş rayonında uza. Qazanda ütkän hönäri belem birü mäs’älälärenä bağışlanğan utırıştan tış, cıyılışnıñ tağı 4 seksiäse Täteş rayonınıñ törle mäğärif oyışmalarında ütte. 9 avgustta respublikanıñ mäğärif xezmätkärläre tarmaqtağı iñ aktual’ problemalar, alda torğan möhim problemalar turında kiñäşläşte. Tatarstannıñ Fän häm mäğärif ministrı Räis Şäyxlislamov citäkçelegendäge seksiädä süz munitsipal’ mäğärif sisteması, anıñ kiläçäge häm mömkinlekläre xaqında bardı. Anda mäğärif idäräläre citäkçeläre, munitsipal’ xakimiät wäkilläre qatnaştı. Balalar baqçaları häm mäktäplär citäkçeläre, uqıtuçılar Mäğärif däwlät proyektı, anı tormışqa aşıru yulları turında fikerläşte. Söyläşüne Fän häm mäğärif ministrlığı wäkilläre alıp bardı. Tağın ber seksiädä respublikanıñ mäğärif tarmağında kontrol’ itü häm mäğlümäti-metodik yärdäm belän tä’min itü üzäge häm anıñ rayonnardağı wäkilçelekläre xezmätkärläre cıyılıp üzäkneñ eşçänlege häm anı kiñäytü yulları turında kiñäşläşte. Utırış belän respublikanıñ Mäğärifne üsterü institutı rektorı İlsur Hadiullin citäkçelek itte. Munitsipal’ mäğärif oyışmaları citäkçeläre isä üzläreneñ oyışmalarınıñ Mäğärif däwlät proyektı qısalarında üseşe xaqında süz alıp bardı. Monnan tış kiñäşmädä qatnaşuçılar Täteş rayonınıñ mäğärif oyışmaları belän tanıştı, üzara täcribä urtaqlaştı, törle kürgäzmälärne qaradı.

Äytergä kiräk, xäzer avgust kiñäşmäsenä respublika citäkçelegeneñ dä iğtibarı zur. Anda soñğı yıllarda Tatarstan prezidentı Mintimer Şäymiev, xökümät citäkçeläre, parlament räise, deputatlar da bik yış qatnaşa. Alar bulğaç, rayon xakimiäte başlıqları dä barmıy qalmıy uqıtuçılar cıyınına. Bıyıl da Tatarstan mäğärif ölkäse xezmätkärläre respublika citäkçelegeneñ iğtibarsızlığına zarlana almıy. 10 avgustta Täteş şähäreneñ rayon mädäniät yortında uzğan avgust kiñäşmäseneñ plenar utırışına Mintimer Şäymiev, Rawil Moratov, Färit Möxämmätşin, deputatlar, rayon başlıqları kilde. Plenar utırışta qızıqlı çığışlar da az bulmadı. Anda süz Mäğärif däwlät proyektın respublikada tormışqa aşıru, Awıl mäktäplärenä yärdämne arttıru, Berdäm däwlät imtixannarınıñ näticäläre turında çığışlar buldı. Tatarstannıñ Fän häm mäğärif ministrı Räis Şäyxlislamov isä, cıyıluçılarnı Rusiä küläm ütkän innovatsion mäktäplär bäygesendä ciñüçelär xaqında äytte. Şunısın da äytergä kiräk, älege mäktäplär yaxşı eş näticäläre kürsätsä, alarğa respublika xökümäte tarafınnan da 1 million sum aqça bireläçäk. Şulay uq plenar utırışta çığış yasağan citäkçelär ağımdağı yılnıñ oktäber ayınnan respublika uqıtuçılarına xezmät xaqın arttırırğa da wäğdä birde.

Gölnaz İlgizär

XS
SM
MD
LG