Accessibility links

шимбә, 10 декабрь 2016, Казан вакыты 17:42

Britaniädä "yaña 11 sintäber" - bik zur terror ğämäle oyıştıru niäte faş itelgän


Atnakiç könne Britan politsiäse Britaniä belän Quşma Ştatlar arasındağı oçqıçlarda şartlawlar äzerlängäne turında xäbär itte. Politsiä äytüençä terrorçılar şartlatqıçnı oçqıçqa qul bagajı belän alıp kerergä niätlägän. 21 keşe qulğa alınğan. London hawa alanı waqıtlıça yabılğan. Başqa il kompaniäläre dä iminlek çaraların köçyätte.

Qayber mäglümät çaraları bu xälne "kisätelgän 11 sintäber" dip atadı. Britan räsmiläre äytüençä, terror ğämälläre berniçä ay aldan, bik centekläp äzerlängän. Şartlawlar beryulı berniçä oçqıçta, yul urtasında, Atlantik okean östendä bulası bulğan. Bu niätlär tormışqa aşqan bulsa, qorbannar sanı bik zur bulır ide di Britaniä eçke eşlär ministrı John Reid:

"Politsiä Mİ5 xezmäte belän berlektä uzğan töndä terrorğa qarşı bik zur operatsiä başqardı. Berniçä oçqıçnı hawada şartlatu niäten kisätte. Ğämälgä aşqan bulsa, yuğaltular moñarçı kürelmägän däräcädä bulır ide" di eçke eşlär ministrı.

John Reid ildäge terror qurqınıçı däräcäsen iñ yuğarı "qızıl" däräcägä kütärde. Britaniäneñ Mİ5 İminlek xezmäte säxifäsendä yazılğança, bu "terror höcüme yaqın arada kötelä" digänne añlata.

Politsiä London tiräsendä 21 keşene qulğa alğan. Eçke eşlär ministrı John Reid fikerençä, töp şiklänüçelär alar arasında bulırğa tieş.

Scotland Yard mäglümätenä qarağanda, terrorçılar şartlatqıçnı oçqıçqa qul bagajı belän alıp kerergä cıyınğan. Tikşergändä sizelmäsen öçen sıyıqça şartlatqıç saylanğan. Bu sıyıqça matdälärdän oçqıçnıñ üzendä şartlatqıç yasalası bulğan.

Britaniä hawa alannarında yaña tärtip kertelde. Transport ministrı Douglas Alexander süzlärençä, xäzer oçqıçqa qul bagajı alıp kerü tıyılğan bulaçaq:

"Qul bagajları xäzer centekläp tikşereläçäk, şuña kürä anda berniçä iñ kiräk äyber genä bulırğa tieş. Çığarma fäqät yäş balalı keşelärgä häm daru yörtüçelärgä. Amerikağa oçqan oçqıçlarda östämä çaralar küerlä" di transport ministrı.

İminlek çaraları Quşma Ştatlarda da köçäytelä. İlneñ eçke iminlek idaräse başlığı Michael Chertoff:

"Terrorçılarnıñ sıyıqça şartlatqıç qullanuın iskä alıp, bez oçqıçqa sıqıyqça alıp kerüne waqıtlıça tıydıq. Bagajda nindi dä bulsa sıyıqça, gellär bulmasqa tieş" Quşma Ştatlar eçke iminlek idaräse başlığı.

Bu terror ğämällären kem oyıştırırğa cıyınğanı älegä bilgesez. Quşma Ştatlar baş prokurorı Alberto Gonsales monıñ artında Äl-Qaidä tora ala dide:

"Bez älegä bu bäyläneşlärne tikşeräbez. Ämmä monıñ işe ğämällär Äl-Qaidä taktikasına oçağan" di Quşma Ştatlar baş prokurorı.

Londonnıñ Heatrow hawa alanı waqıtlıça yabıldı. Britaniä, Quşma Ştatlar ğına tügel, başqa il kompaniäläre dä köçäytelgän iminlek çaraları kürä.

ali ğilmi
XS
SM
MD
LG