Accessibility links

якшәмбе, 11 декабрь 2016, Казан вакыты 11:07

Britaniä: oçqıçlar şartlatu niätendä ğäyeplängän 24 keşe qulğa alınğan, yanaw däräcäse yuğarı bulıp qala


Britan politsiäse belderüençä, Amerikağa oçqan oçqıçlarnı şartlatırğa cıyınğan 24 keşe qulğa alınğan. Şularnıñ 19-ınıñ bank xisapları tuñdırılğan. Eçke eşlär ministrı John Reid, ildä kertelgän iñ yuğarı terror yanawı däräcäse älegä köçendä qala dip belderde.

Angliä Bankı şul 19 keşeneñ isemnären iğlan itte. Alar nigezdä 20 yäşlär tiräsendäge möselman yegetläre. İñ yäşenä 17, iñ qartına – 35. Britaniädä tuğannar, çığışı belän Paqstannan bulğan immigrant balaları dielä.

Comğa könne şul açıqlandı, bu terror ğämällären faş itüdä Britannarğa Quşma Ştatlar ğına tügel, Paqstannıñ iminlek xezmätläre dä yärdäm itkän. Bu turıda Britaniä Eçke Eşlär ministrı John Reid üze äytte:

"Bez yärdäm itkän bar illärgä, şul isäptän Paqstanğa da, räxmätebezne bezlderäbez" di John Reid.

Alay ğına tügel, bu xällärgä bäyle räweştä Paqstannıñ üzendä dä berniçä keşe qulğa alınğan. Şularnıñ kimendä ikese Britan wadandaşı dielä.

Terrorçılar qulğa alınsa da, terror yanawı äle dä iñ yuğarı däräcädä qaldırılğan. John Reid üze, töp oşıtrıuçılar şuşı 24 keşe arasında bulırğa tieş di. Şul uq waqıtta, tağın 5 keşe äle dä ezläwdä dip xäbär itelä. Bu ber. İkençedän, räsmilär terror yanawı äle köçendä dip sanıy häm bar cämğiätne bu qurqınıç aldında berläşergä çaqıra.

Şul uq süzlärne Amerikan prezidentı George Bush ta äytte. "Xäzer bez 11 Sintäbergö qädäre belän çağıştırğanda iminräk. Amerikan xalqın saqlaw öçen küp çaralar küräbez. Läkin, älbättä, bez tuılsınça imin tügel. Çönki äle dä bezgä zıyan kiterergä telägän keşelär bar" di amerikan prezidentı. Bu çığşında Bush "İslam faşistları" digän tupas süzlär qullandı.

Hawa yullarında kürelgän iminlek çaralarına kilgändä. Räsmilär äytüençä, terrorçılar oçqıçqa sıyıq şartlatqıç alıp kerergä cıyınğan. Yağni, berniçä keşe maxsus sıyıqçalar, cihazlar alıp kerep, şulardan oçqıçta şartlatqıç yasarğa niätlägän. Menä şunı iskä alıp xäzer Britaniä, Quşma Ştatlar hawa alannarında bik qırıs çaralar kertelde. Üzeñ belän qulda berni alıp kerergä yaramıy. Bernindi sıyıqça, xättä, xuş isle may, losyonnar tıyılğan. Xättä kitap alırğa yaramıy. Amerikağa 6-7 säğät oçqan keşelär öçen bu älbättä bik awır.

Läkin bit yäş balalı änilär, daru yörtergä mäcbür awırular bar, alar nişlärgä tieş? Bu ike oçraqqa çığarma yasalğan. Ämmä qayber xäbärlärgä qarağanda, bu keşelär dä darunıñ daru, sötneñ söt ikänen isbatlarğa, hiç yuğı, üzläre eçep kürsätergä tieş.

Ali Ğilmi
XS
SM
MD
LG