Accessibility links

сишәмбе, 6 декабрь 2016, Казан вакыты 05:50

BMOnıň İzrail-Liban qararı qabul itelde


Berläşkän Millätlär Oyışmasınıñ İminlek şurası izrail-liban nizağına bağışlanğan rezolutsiäne qabul itte. Bu doqument İzrail ğaskärläre häm Libandağı Xizbulla suğışçıları arasında utnı kiçekmiçä tuqtatu turında.

Quşma Şatatlar däwlät sekretare Kondalíza Rays rezolutsiagä qarata bolay dip äytte: “Bu rezolusiane qabul itü xalıqara cämäğätçelekkä Liban belän İzrail arasında tınıçlıq yulı açırğa bulışaçaq. Bu tınıçlıq soñğı aylarda duçar bulğan keşelärneñ cäfa çigüen häm köç qullanunı tuqtataçaq”.

Elegräk İzrail häm Liban bu rezolutsiagä qarşı tügel ikänleklären töşendergän ide. İzrailneñ tışqı eşlär ministrlığı wäkile Mark Regev bolay dide: “Bu- Xizbulla suğışçılarınıñ çik buyı öleşenä qabat kilmäwenä, Süriäneñ häm İrannıñ alğa taba da Xizbullanı qorallandırmawına ğarantiä bulıp tora. Ä xalıqara cämäğätçelek törkemnärne tulısınça qoralsızlandırunı taläp itäçäk. Bu nigezdä, minem uylawımça, İzrail käbinetı rezolutsiane xuplayaçaq häm bu yünäleştä säyäsi cayğa salunı däwam itäçäk”. Liban xökümäte dä aşığıç kiñäşmägä cıyıla. Libannıñ tışqı eşlär ministrı Tarek Mitri rezolutsiagä mönäsäbättä bolay dide: “Libandağı İzrail operasiasen tuqtatu öçen İminlek şurasınıñ bu rezolusiase kiçekmiçä ğämälgä kerergä tieş”.

Evropa Berlege BMO İminlek şurasınıñ izrailliban nizağın cayğa salu rezolusiasen qabul itüne xupladı. Europa şurasınıñ tışqı säyäsät başlığı Xavier Solana bolay dide: “Min ışanam, BMO iminlek şurası qabul itkän rezolusia töbäktä suğışnı tuqtatuğa kiterer, ozaqqa tınıçlıq alıp kiler. Liban xalqı moña layıq”,- dide Evropa şurasınıñ tışqı säyäsät başlığı Xävier Solana.

Rezolutsiadä bu nizağ töbägenä 15 meñ tınıçlıq saqçısı cibärü xuplana. Alar Libannan İzrail ğaskärlären çığarunı tikşeräçäk häm tınıçlıq urnaştıruda Liban ğaskärlärenä bulışaçaq.

BMOnıñ Yaqın Könçığıştağı wäkile Älvare de Soto, tınıçlıq köçläre nizağ töbägenä berniçä könnän kertelä başlarğa mömkin di. Anıñ äytüençä, älegä tögäl grafigı tözelmägän. Diplomat, yaña ğına qabul itelgän rezolutsia nigezendä, xalıqara iminlek köçläre Libannıñ könyäğına bu il ğaskärläre belän bergä yünäläçäk, di. Berläşkän Millätlär Oyışması Xizbulla suğışçıların qoralsızlandıru planın äzerli.

XS
SM
MD
LG