Ğäcäyep ildä häm ğäcäyep çorda yäşibez. Här buın kimendä ikeşär- öçär reforma belän ğazap çigä. Kreml' türäläreneñ uñ qulları yazğannı sul qulları belmi kebek.
Rossiädä faciğä. Yıl sayın bez millionğa yaqın keşebezne yuğaltabız. Şunısı ayanıç, xalıq sanın arttıruda xökümätebez konkret çaralar kürmi.
Rossiä prezidentı bala tabuçılarğa matdi yärdäm wäğdä itä. Läkin bit monda ber çara ğına tügel, ä kompleks çaralar kiräk. Samara tatar milli xäräkät liderları Rusiä prezidentı Vladimir Putinğa, Däwlät Dumasına, “Berdäm Rossiä” firqäse citäkçelärenä, Samar gubernatorına, Guberna Duma räisenä, ölkä mäğärif ministrlığına, Tatarstan İlbaşı Mintimer Şäymievkä tübändäge möräcäğätnämäne cibärdelär:
“Watanıbız Rossiädä balalar tabu öçen matdi yärdäm birü turındağı programmağız küplärne quandırdı. Bu bik waqıtlı häm möhim adımığız, çönki Watanıbız üzeneñ töp xalqı isäbenä genä köçle bula ala. Waqıtlıça eşkä kilgännär ilneñ töp patriotik köçläre bula almıy. Sez izge programmalar iğlan itäsez, ä töbäklärdäge awıllarda mäktäplärne ereländerälär. Urta mäktäplär sanı azaya bara, 8-9 klasslıqların başlanğıç sıynıfqa äyländerdelär. Balalarnı kürşe awıllarğa taşu kitte. Bişençe klasstan başlap balanı kürşe 10- 17 km yıraqlıqtağı awıllarğa taşığaç, niçek inde bala tapsınnar? Mäktäp bulmağan awılda nindi bala üseşen kötärgä? Balalarnı ikençe awıllarğa taşu zur küñelsezlärgä kiterü ixtimal (avariä, balalarğa suıq tiderü, ata- ana balasına töple tärbiä birä almıy, ata- analar belän uqıtuçılar arasında elemtä yuğala häm başqalar). Şul qädär problemalar tuğan çorda bala tabu teläge yuğalaçaq.
Bez ışanabız, 5- 10 yıldan balalar sanı artaçaq häm awıl mäktäplären ereländerü säyäsäten 10 yılğa tıyıp torırğa kiräk. Rossiäneñ altın zapası awıl uqıtuçısına eş xaqı tülärlek kenä tügelder bit?
Bulğan, cibärelgän xatalarnı qabatlamasqa ide. Berniçä yıl elek balalar baqçalarınıñ ber öleşen yaptılar, sattılar. Xäzer baqçalarda urın citmi.
Xörmätle Prezidentıbız!
Awıl mäktäplären, az sanlı uquçıları bulğan awıl mäktäplären yapmıyça, ereländermiçä saqlap qalsaq, bez Rossiäne saqlap qalaçaqbız.”
Şamil Bahautdin, Samar
