Accessibility links

шимбә, 10 декабрь 2016, Казан вакыты 02:23

Qazannıñ "Simona" üzäge Rusiädä berdänber


Qazanda Rusiädä äle moñarçı bulmağan ber üzäk eşläp kilä. Cirle räsmilär häm xökümättän bäyäsez oyışmalar yardäme belän oyışqan bu üzäktä – faxişälär tikşerü ütä. Anda eşläwçelär – faxişälär belän eşläw – xalıqqa yoğışlı çirlärne taratmaw yullarınıñ berse dip sanıy.

Ğinwar ayında açılğan "Simona" üzägenä faxişälär tikşerener öçen kilä. Alarnıñ törlese törle säbäptän uramğa çıqqan. 33 yäşlek İrina:

"Narkotikka aqça kiräk ide, şuña faxişä buldım. Elek irem bire ide, ul ülgäç aqça citmi başladı."

İrina 6 yıl elek heroin qullana başlağan. İre ülgäç aqça citmi başlağaç üz tänen satıp aqça eşlärgä qarar qılğan. "Simona" üzägenä İrina ğadäti tikşerenü – qan analizların birergä kiräk. Bolar öçen monda kilüçelär ber ni dä tülämi. Üzäk şulay uq medetsina xezmätkärlären faxişälär belän eşlärgä öyrätä. Venerolog tabibä Albina Zaripova, Tatarstandağı faxişälärneñ küpçelege kimendä ber yoğışlı çir belän awırıy, di:

"Alarnıñ 80%tında gepatit bulsa da bar. Här 4nçesendä VİÇ bar disäm – küp bulmas."

Şuşı çirlärne başqalarğa da ypqtıra ala torğan faxişälärne tikşerep torıp häm däwalap, Qazan üzäge – çirlärne tuqtatıp bulır dip farazlıy. "Simona" üzäge faxişälär üzläre kiler dip kenä kötep yatmıy. Xezmätkärlär uram qızları torğan cirlärgä barıp añlatu eşlären alıp bara, iğlannar tarata, seks xezmät kürsätüçe şirkätlärgä barıp faxişälär belän oçraşa. Üzäkkä ışanıç ta arta bara. Bügen könenä urtaça 8 xatın-qız kilep tikşerenä ikän. İrina da monda teläp yöri:

"Keşelär yaxşı monda, yardäm itälär. Elek ber bolnitsaga barğan idem, anda şaqşı, tarakannar bar ide. Vraçlar naçar ide."

Rusiädä VİÇ inveksiäse başqa illär belän çağıştırğanda bik zur tizlektä tarala. Federal AİDS üzäge xäbär itüençä, Rusiädä bu çir belän million yarım keşe yäşi. SPİDqa qarşı köräş – töp maqsatlar rätendä quyılsa da, eşlängän eşlär barmaq belän genä sanarlıq. Alay da bıyıl Rusiädä SPİDqa qarşı köräşkä açqa uzğan yıl belän çağıştırğanda 20 märtäbä kübräk bülengän. Aqça ber mäsälä, VİÇ infeksiäse belän yäşäwçelärgä cämğiättä qaraş – ikençe ber qatlawlı mäsälä. Qazandağı "Simona" üzäge şundıy ruxi kirtälärne cimerergä tırışa. Üzäk xezmätkärläre faxişälärgä "aqıl öyrätmi" , eşlärennän kitergä ügetlämi. Şunıñ belän alar üzlärenä ışanıç qazana. "Simona" idaräçese Svetlana Koçetkova, maqsat – faxişälekkä qarşı köräş tügel, ä anıñ naçar näticälärenä qarşı köräş, di:

"Bezneñ maqsat – inde bulğan xäl belän eş itü. Minem seks xezmätendä eşläwçelärgä ber qarşılığım da yuq. Bez wazğiätne niçek bar şulay qabul itäbez. Keşe üz yulın saylağan, bezneñ eşebez barı tik aña yardäm itü. "

Barısınnan bigräk üzäkkä kilgän xatın-qızlarğa alarnı añlaw häm söyläşep utıru möhim. Faxişälärneñ qayberläre biredä üz tännären satudan baş tartıp başqa eş ezlärgä qarar qıla, di Simona üzäge administratorı Älfiä Novikova:

"Alarnı cämğiät çitkä tipkän. Ämma minem öçen alar döres yuldan taypılğan qızlarım kebek. Alarnıñ kübese bik yäş, 16, 17 yäşendä inde alar uramğa eşkä çığa. Küptän tügel min 17 yäşlek ber qız belän utırıp söyläştem. Aña qaya barırğa, qayda uqırğa dip söyläştek. Ana belän qız-bala arasında bulırğa tieşle söyläşü buldı.."

"Simona" üzägeneñ isä kiläçäkkä plannarı zur. Qazanda anıñ uñışlı eşläwen kürep Rusiäneñ başqa töbäklärendä dä bu tör medetsina üzäkläre açılır digän ömet bar.

Albina Zaynulla, Alsu Qormaş

XS
SM
MD
LG