Accessibility links

шимбә, 10 декабрь 2016, Казан вакыты 17:46

Başqortstanğa federal türälär “yabırıla”


Uzğan atna axırında respublikta federal citäkçelär bulıp kitte. 10nçı august Başqortstanğa Rusiäneñ mäğärif ministrı Andrey Fursenko kilgän ide. Ul Başqortstan uqıtuçılarınıñ august kiñäşmäsendä buldı, Ufa neft-texnik uniwersitetı studentları häm uqıtuçıları belän oçraştı. Säfär axırında respubliktağı mäğärif torışı belän qänägät qaluın belderde.

11 august Ufağa ilneñ vitse-premrı Dmitriy Medvedev kilde. Ul başqalanıñ Sipaylowo bistäsendä balalar sport üzägen açu çarasında, uqıtuçılarnıñ august kiñäşmäsendä qatnaştı. Säfäreneñ maqsatı - federal programmalar ütäleşe belän tanışu.

Şul uq könne kiçke yaqta Rusiäneñ finans ministrı Aleksey Kudrin kilde. Ul Başqortstannıñ Rusiägä üz irege belän quşılunıñ 450 yıllığın bäyräm itüne oyıştıru idaräse räise. Kudrin 12 august Ufada barğan tözeleş eşläre belän tanışqannan soñ oyıştıru idaräse utırışın uzdırdı. Berençe utırış uzğan yılnıñ dekäbr ayında uzğan ide. Utırışta respubliknıñ milli säyäsät häm mädäniät ministrı İldus İlişev Zahir İsmäğilov isemendäge sänğät uçilişçesına muzıyka qoralları alu öçen qaralğan 1 million sum aqça urınına 8 million soradı. Qudrin älege mäsäläne uñay xäl itärgä ışandırdı. İlişev annan qayber binalarnı tözekländerü öçen dä yärdäm soradı, tik ul binalarnıñ respublik milke ikänen belgäç ministr alar respublik qaznası aqçasına tözekländerelergä tieş dide. Şul uq waqıtta tarixi ähämiäten iskä alıp Üzäk diniä näzaräten tözekländerü öçen yärdäm itü yulları ezlärgä ışandırdı.

Bäyräm barlığı 43,7 milliard sumğa töşäçäk, şunıñ 13 milliardı federal, 9 milliardı respublik qaznaları isäbenä, qalğanı inwestorlar yärdäme belän finanslanaçaq.

Respubliknıñ eçke eşlär ministrlığına bäyräm çaralarında xäwefsezlek belän täemin itü öçen östämä 50,5 million sum aqça bülenäçäk.

XS
SM
MD
LG