Accessibility links

шимбә, 3 декабрь 2016, Казан вакыты 14:48

Omskida balalar öçen milli mädäniätlär könnäre


Omski ölkäsendä yäş buınnı milli ruxta tärbiäläw maqsatı belän qayber çaralar ütkärelä. Mäsälän, ayırım mäktäplärdä tolerantlıq temasına däreslär, milli festival'lär, konkurslar oyıştırıla. Bıyıl balalarnıñ cäyge yal itü urınnarınıñ qayberlärendä milli mädäniätlär festivale oyıştıru da ğämälgä kerä başladı. Düşämbe könne Omskidan yıraq bulmağan “Solneçnıy” balalar cäyläwendä şundıy festival' start aldı. Festival'ne açu serremoniäsendä şähärdä eşläp kilüçe milli kollektivlarnıñ qayberläre qatnaştı. Festival' qısalarında cäyläwdä törle milli çaralar oyıştırılaçaq, qayberlärendä milli kollektivlar da cälep iteläçäk. Tatar mädäniätenä bağışlanğan çaralar 21 avgust könne bulaçaq. Anda “Ömet” balalar törkemeneñ Häm “Umırzaya” kollektivınıñ çığışları qaralğan.

Şuşı könnärdä genä Tara şähäre yanındağı “Lesnaya polyana” dip isemlängän balalar cäyläwendä dä milli mädäniätlär köne bulıp uzdı. Anda Taranıñ “Duslıq yortı” qaramağında eşläwçe kollektivlar citäkçeläre balalarğa üz millätläreneñ bäyrämen kürsätergä, milli uyınnar oyıştırırğa, milli aşlar belän tanıştırırğa tieş idelär. Tatar mädäniät üzäge citäkçese Rauşaniä Kurmanova balalarnı milli bäyrämebez - Sabantuy belän tanıştırdı, çäk-çäk belän sıyladı. Tanıştıru konkurs räweşendä oyıştırılğan ide. Rauşaniä xanımnıñ oyıştıru säläte ikençe urınğa layık dip tabıldı.

Taranıñ “Balalar icat üzägendä” şöğellänüçe kollektivlarnıñ çığışları milli mädäniätlär könen yämländerep cibärde. Tatar, alman häm latış balalarnıñ çığışları balalarnı bitaraf qaldırmadı., ayıruça “Yaqtaş” klubı balaları çığışı. Klubnı Äl'firä Deket citäkli. Küplär kebek, Äl'firä xanım da rus möxitendä tuıp-üskän, beleme buyınça rus tele uqıtuçısı. Tatar telen yaxşıraq öyränü öçen üze dä tatar tele däreslärenä yöri. “Yaqtaş” balaların ul xalqıbıznıñ märkäze – Qazanğa alıp barırğa xıyallana.

Saniä Mirxaleewa, Omski

XS
SM
MD
LG