Accessibility links

Кайнар хәбәр

Paul Salem: İzrailneñ Xizbulla belän nizağında iñ ottırğan taraf bulıp Liban tora


Libanda şulay itep, atış tawışları inde işetelmi, qaçaqlar bombalanğan yullar buylap äkrenläp torğan cirlärenä qayta, yaqlar üzläreneñ yuğaltuların açıqlaw eşenä kereşä. Töp sorawlarnıñ berse bulıp xäzer bu nizağtan kem ottı, häm kem ottırdı, digäne tora. Şuña cawap birüne ütenep "Azatlıq" radiosı Carnegie fondındağı Yaqın Könçığış üzägen citäklägän Paul Salemğa möräcäğät itte.

*?* Soraw inde yañğıradı - kemne bu oçraqta ciñüçe dip sanap bula soñ?

"Bu oçraqta min küpmeder däräcädä här tarafnı da ottıruçı dip sanar idem. İzrail üzeneñ ciñelmäslek häm dähşätle köç bulıp toru xisen yuğalttı, Xizbulla üzeneñ raketalarınnan qorı qaldı häm Liban eçendäge säyäsi urınına zian kiterde. İran Libanda başqalarnı qurqıtıp toru qüätennän mäxrüm qaldı, ä inde Quşma Ştatlar dönyanıñ şuşı töbägendäge abruyın tağın da nığraq yuğalttı. "

*?* Ägär dä inde ber genä yaq ta ciñüçe tügel ikän, hiçyuğı kem dä bulsa başqalarğa qarağanda beraz ğına aldaraq kilmädeme?

"Moña cawap Berläşkän Millätlärneñ İminlek Şurası qabul itkän qararnı ğämälgä quyuğa, andağı ayırım taläplärne ütäwgä bäyle. Ul tulısınça çınğa aşsa, Xizbulla, miña qalsa, kübräk ottıraçaq, ä inde Quşma Ştatalar, xalıqara cämäğätçelek, häm öleşçä İzrail küpmeder däräcädä ciñüçe bulaçaq.

Şunı da äytep ütü möhim - il bularaq iñ zur ottıruçı monda Liban. Xucalıq çeltärenä kilgän zian häm keşe ğömerlären yuğaltu yağınnan qarağanda, Liban cämğiate dä, andağı näzberek säyäsi sistema da zur zian kürde. Xäzer anda xalıq kütäreleşe, watandaşlar suğışı qurquları bar - şuña da nizağtan iñ zur ottıruçı Liban bulıp çığa."

*?* Öylärenä qayta başlağan libanlılarnı Xizbulla İzrailgä qarşı suğışta ciñügä ireşü belän qotlıy, digän xäbärlär bar. Andıy çara yardämendä Xizbulla närsägä ireşergä teli?

"Aña bu integülärne häm yuğaltularnı älbättä, säyäsi wä xärbi ciñü itep sürätläw bik kiräk. Häm bu küpmeder däräcädä çınnan da şulay. Xizbulla İzrailneñ bar xärbi qüätenä ber ay buyı qarşı torğan häm ottırmağan berdämnber ğäräp köçe, ğäräp ğäskäre bulıp tora. Älege suğış anı tar-mar itü belän tügel, ä barı tik atışlarnı tuqtatu kileşüe belän genä tuqtatıldı. Häm ul monı awıllarına kire qayta başlağan keşelärgä kürsätergä dä teli - yuğaltularğa qaramastan bez şular aşa üzebez öçen faydalı ber närsägä dä ireştek, bu ğorurlanırlıq ber närsä, dimäkçe Xizbulla."

*?* Ä İran bu nizağtan niçegräk çıqtı - anıñ xäle xäzer yaxşıraqmı, ällä naçarraqmı?

"Törleçä, axırğı çiktä şaqtıy qatlawlı xäldä, diär idem. Beryaqtan, İzrailgä şulay qatı qarşı torğan oyışmanı, yäğni Xizbullanı yaqlap, İran ğäräp wä islam dönyasında küpmeder abruy qazandı. Ämma ikençe yaqtan, Xizbullanıñ ğäskäri qüätenä şundıy zur zian kiterü xäzer anı İran mänfäğätendä qullanu mömkinleklären çikli. Xizbulla älegä qädär İrannıñ üzenä İzrail yä Quşma Ştatlar yağınnan yasala alırlıq mömkin höcümnän totıp toruçı töp köç ide. Bu yaqtan qarağanda İran ottırdı, xäzer anıñ atom programması yänä xalıqara cämäğätçelek iğtibarına açıldı häm aña yasala başlayaçaq säyäsi basım xäzer näq menä şul ölkädä bulaçaq."

Sez Carnegie fondında Yaqın Könçığış üzägen citäklägän Paul Salem fikerläre belän tanıştığız, cawaplarnı Kärim Kamal tärcemä itte
XS
SM
MD
LG