Armiädän bik awır xäldä qaytarılğan Qazan yegete Radik Xäbirovqa yärdäm itärgä teläwçelär öçen Tatarstan bankında xisap açılğan. Bu könnärdä Xäbirovlar ğailäse Boston şähärendäge balalar gospitale fänni xezmätkärennän aqçalata yärdäm alğan. AQŞ biologı Radik tormışı öçen bik möhim bulğan eşlärne başqara.
Döresräge çit il belgeçe Andrey Krivsov Qazan yegetenä yärdäm itü öçen älege xisapnı üze açtırğan. Ul AQŞtan Qazanğa aqçanı cibärü mäs’äläse belän Qazannıñ xoquq yaqlaw üzägenä möräcäğät itkän. Xoquqçılar Radiknıñ ätisen bankta xisap açarğa öndägännär. Yal könne Boston balalar gospitale belgeçe märtkä kitü xälendä yatqan keçe serjant Radik Xäbirovqa aqça küçergän. Rusiädän kitep bügen çit ildä yäşäwçe Andrey häm anıñ xatını Tat'yana Krivsovı Rusiä armiäsendä bulğan wäxşilekkä şaqqatqannar. Başta Çiläbe yegete Andrey Sıyçev, xäzer Radik Xäbirov. Tat'yana üzeneñ ike yäşlek ulı öçen şatlanıp tuya almıy, çönki aña Rusiäneñ armiä saflarında xezmät itärgä turı kilmäyäçäk. Tat'yananıñ ire Andrey da - min bäxetle keşe - Rusiädä xezmät itmädem di häm böyek däwlätneñ armiäsendä imgänep qalğan soldatlarğa yärdäm kürsätüne Andrey üz burıçı itep sanıy.
AQŞta Andrey Krivsov rak awıruın däwalawnıñ yaña ısulların öyränä. Boston balalar gospitale belgeçe Rusiä tabipları belän aralaşıp tora. Bu atnada ul Mäskäw tabipları belän Radiknıñ sälämätlege xaqında söyläşergä cıyına. Ä älegä Andrey Krivsov märtkä kitü xälendä yatqan Radik öçen maxsus aşata torğan quşılmalar isemlegen äzerlägän. 2 avgusttan başlap Radik Xäbirov Qazannıñ veterannar gospitalendä tügel, ä üz ätise, tuğannarı qulında. Xastaxanädän soñ berençe könnärdä Radiknı waqlanğan ğädäti aşamlıqlar belän tuqlandırğannar. Çönki tabiplar aşatu buyınça maxsus kiñäşlär birmägän alarğa. Andrey Krivsov tözegän isemlektäge qayber quşılmalar Rusiädä tabılmasa, çit il belgeçe alarnı Qazanğa poçta aşa cibäräçäk.
Qazannıñ veterannar gospitale baş tabibı Färit Zakirov äytüençä, Radikka yärdäm itärgä teläwçelär küp. Qazanlılar Xäbirovlarğa şaltıratıp, buldıra alğança yärdäm itä. Kemder 500, kem 1000 sum aqça birä.
Radik xezmät itkän Totsk garnizonına Tatarstannıñ ictimaği palata äğzaları barırğa cıyına. Anda şulay uq Radikka xoquqi yärdäm kürsätkän Qazannıñ xoquq yaqlaw üzäge belgeçläre dä baraçaq. Alar Radik Xäbirov eşen tikşerü, Totsk xärbi bülegendä yegetlärneñ xezmät itü şartları belän tanışu öçen bara.
İsegezdä bulsa, Çiläbe yegete Andrey Sıçev waqiğasın federal' televideniedän kürsätkäç, ilneñ böten saqlaw ministrlığı ut qapqanday buldı. Sıçev yazmışı belän ministr Sergey İvanov şäxsän qızıqsındı, ğailäsenä fatir birelde, däwalanu tä'min itelde. Andrey Sıyçev prezident putinnıñ yaqın keşese ministrğa da, danın kütärergä tırışqan Rusiä armiäsenä dä zur “zıyan kiterde”. Televidenie yärdämendä tağın ber şundıy oçraq böten il xalqına bilgele bulsa, närsä bulıp betär? Şunıñ öçen Radik Xäbirov turında gäzitlärdän ğına uqıp belergä bula. Şuña kürä dä, Sıçevtan ayırmalı bularaq, märtkä kitü xälendäge Radik öyendä yalğız ätise qulına qalğan. Yegetneñ terelä aluında ömet bik az bulsa da, ämma ul bar. Yeget äle isän. Aña yaxşı darular kiräk. Yegetkä yärdäm itärgä teläwçelär Radiknıñ ätise Säyetgäräy Xäbirov isemenä açılğan xisapqa aqça sala ala.
OSB "Bank Tatarstana" nomer 8610. Qor.sçet 30101810600000000603
Rasç.sçet 30301810162000606226 İNN 7707083893/165702001
BİK 049205603 LOSB 6672/0179 l/s 42306810362266636771/34
Valyutnıy sçet:
Intermediary bank:
American Express Bank Ltd., 23-rd floor, American Express Tower, 200 Vesey Street, New York, N.Y.,
10285-2300 USA, S.W.I.F.T.: AEIB US 33
Beneficiary bank:
AK BARS Bank, Address: 420066 Kazan, Russian Federation, Dekabristov street, 1, S.W.I.F.T.: ARRSRU2K.
Al'bina Zäynulla
