Accessibility links

пәнҗешәмбе, 8 декабрь 2016, Казан вакыты 15:08

Omskida “Azatlıq”nı tıñlıylarmı?


2006 yılnıñ başınnan Rusiäneñ küp kenä töbäklärendä kebek Omski ölkäsendä dä milli tapşırular, şul isäptän tatar telendä alıp barıla torğan radiotapşıru da yabıldı. Tatar xäräkäte aktivistları tarafınnan tapşırunı tergezü östendä ozaq qına waqıt eş alıp barılsa da, älegä uñışqa ireşelmäde. Ölkä xakimiäte citäkçelege milli tapşırularnı qabat “İrtış” ölkä däwlät teleradio şirkätendä tergezü mömkinlege bulmawı turında belderde, ämma şulay da ölkä külämendä FM dulqınnarında eşläwçe ikençe ber şirkät'tä efir waqıtı birergä wäğdä itte. Xäzer älege şirkät citäkçelege belän nindi şartlarda tatar tapşıruın efirğa çığaru turında söyläşülär alıp barıla. Näticä nindi bulır, bu xaqta tıñlawçılarğa citkererbez.

Döres, Omski ölkäsendä yäşäwçelär tatar tapşıruların tıñlawdan bötenläy mäxrüm tügellär. Qısqa dulqınlı radioalğıçları bulğan keşelärneñ “Azatlıq” häm “Tatarstan dulqınında” tapşıruların tıñlaw mömkinlekläre bar. Häm, äytergä kiräk, “Azatlıq”nı tıñlawçılar Omskida yuq tügel. Mäs'älän, Tevriz rayonı Tavinski awılında yäşäwçe Alsu häm Ruslan Şaripovlar, Tara rayon üzägendä yäşäwçe Lyutsiä häm Ali Qoldaşevlar, Bol'şereç'ye rayonı Çarnalı awılında yäşäwçe Mahirä häm Ratif Şixovlar, Omskida yäşäwçe Ğalimä häm Äsqat Quramşinnar, Rafail häm Renat Xarisovlar, Räşit Sattarov, Raziä Mäcitova kebek millättäşlärebezne “Azatlıq” radiosınıñ daimi tıñlawçıları dip äytergä mömkin. 30 yıldan artıq tıñlawçılarnı da oçratırğa turı kilgäne bar.

Rafail Xarisov, Räşit Sattarov, Lütsiä häm Ali Qoldaşewlar “Azatlıq” radiosın ozaq yıllar tıñlıylar. Räşit Sattarov tapşırunıñ işetelü sıyfatına qarata fikeren dä belderde. Anıñ süzlärençä, qısqa dulqınnar aşa tapşırıluçı xäbärlärne cirle radiostansiälär aşa köçäytergä kiräk. Räşit äfände “Azatlıq” xäbärläreneñ eçtälegen uñay bäyäli.

Soñğı yıllarda texnik şartlarnıñ üseş ala baruı “Azatlıq” xäbärläre belän internet aşa tanışu mömkinlege dä tudırdı. “Azatlıq” saytına qarata fikeren Renat Xarisov belderde. “Azatlıq” xäbärlären ul internet aşa qarap bara. Anıñ süzlärençä, xäbärlär waqıtlı häm yaxşı birelä. Ämma şrift beraz uñaysızraq, r belän n xärefe quşılıp kitä, şriftın üzgärtsälär, dizaynın yaxşırtsalar äybät bulır ide, tağı da ber teläge: saylap uqırğa mömkin bulsın öçen “kirillitsa”da da variantı birelsä ide.

Rozaliä Sayganova, Omski

XS
SM
MD
LG