Accessibility links

Кайнар хәбәр

Tatarstanda yäş cinayätçelär sanı artqan


Tatarstannıñ eçke eşlär ministrlıysında 2006 yıl xoquq bozularnı kisätü yılı dip iğlan itelgän. Däwlät programması xökümättä äle qarala ğına, respublikada isä yäşüsmer balalar tarafınnan eşlängän cinayätlär sanı bıyıl şaqtıy artqan.

Yäşüsmerlär tarafınnan ike meñnän artıq cinayät häm altı meñ yaña yäş xoquq bozuçı. Şuşı yılnıñ cide ayı öçen militsiä xezmätkärläre şundıy sannar kiterä. Xoquq bozularnı kisätügä bıyıl küp kenä çaralar oyıştırılsa da, yäşüsmerlär arasında cinayätçelek arta ğına bara. Şulay da belgeçlär monı qayber yäşlärneñ bik küp cinayätlär yasawı belän dä añlata. Mäsälän, Yäşel Üzän rayonında ike yäşüsmer 70 cinayät qılğan!

Belgeçlär narkomaniä awıruınıñ yäşärgännän yäşärä kilüen kisätä. Xäzer 11-12 yäşleklär dä äf'yun qullana. Tatarstanda meñnän artıq yäşüsmer äf'yun qullanu öçen administrativ cawaplılıqqa tarttırılğan. Bu uzğan yıl belän çağıştırğanda 60 protsentqa kübräk. Küp kenä cinayätlär yäşlär törkemnäre tarafınnan oyıştırıla. Älege törkemnär militsiä xezmätkärlärneñ iğtibarı üzägendä. Bu turıda çärşämbe könne respublikanıñ eçke eşlär ministrlıysında uzğan matbuğat oçraşuında söylädelär.

Änäs Väliev äytüençä, xoquq bozular nigezdä şähär yäşläre arasında küzätelä. Awıllarda yäşüsmerlärneñ tärtibe yaxşıraq di ul. Şulay da awıllar da bu mäs'älädä çittä genä qalmıy. Awıl yäşläre sirägräk bulsa da, yaltırap qala. Şuşı yılnıñ mayı ayında Bawlı rayonınıñ Urustamak awılında yäşlär arasında bik qatı suğış bulğan. Tönge diskotekada yäşlär törkemeneñ suğışı ülem belän tämamlanğan.

Cinayätlär nigezdä uquçılar tarafınnan eşlänä di belgeçlär. Şuña kürä dä militsiä xezmätkärläre här sentäber ayın borçılıp häm aña äzerlänep kötep tora. Balalarnıñ uqu waqıtındağı tärtiben mäktäp inspektorları küzätep tora. Şulay uq yäşüsmerlärneñ tärtiben saqlawçı inspektor Qazannıñ här rayonında bar. Alarnıñ sanın da arttırırğa cıyınalar. Älege belgeçlär yuğarı pedagogik häm yuridik belemle bulaçaq.

Cäyge yallardan soñ balalarnıñ iğtibarı naçarraq bula. Bu isä alarnıñ tormışı öçen qurqınıç belän yanıy. Çönki näq uqu yılı başında yul häläkätlärenä duçar bulğan balalarnıñ sanı arta. Yartı yıl eçendä genä Tatarstanda 400dän artıq bala maşina astına eläkkän. Alarnıñ 17се wafat bulğan.

Al'bina Zäynulla

XS
SM
MD
LG