Çallınıñ eçke eşlär idäräsendä matbuğat konferensiäse ütte. Anda töp söyläşü yäşüsmerlär cinayätlärenä häm xalıqnıñ zakonsız migratsiäsenä mömkin qädär kirtä quyu xaqında buldı. Biredä äytelgän qayber sannarğa tuqtalam. Bäliğ bulmağan balalar belän eşlär idäräse başlığı R.İskändärova süzlärennän kürengänçä, bügen Çallıda 1800 yaqın awır xolıqlı yäşüsmer isäpkä alınğan. Şularnıñ 170 inde qayçandır xökem itelgännär. Tärtipsez yäşüsmerlär tarafınnan şähärdä soñğı 7 ayda 114 talaw bulğan. İdärä başlığı äytüençä, yäşüsmerlär cinayät eşenä küp oçraqta törkemläp, yäğni, kötü belän baralar. Awır xolıqlı yäşüsmerlärneñ 10%ın qızlar täşkil itä. Bolardan başqa, Çallıdağı 500 artıq ğailä totrıqsızlar isemlegenä kertelgän. Şundıy oçraqta bäyän itelde, yäş kenä ber äni keşe üzeneñ 3 aylıq balasın berniçä kön däwamında aşatmıy. Narasıy açlıqtan ülep kitä. Yäş änigä cinayät eşe açılğan.
Çallı çit il keşelären dä üzenä cälep itä. Migratsiä xezmäte başlığı Zäynäp Ğaliullina mondıy sannar kiterde:
Xäzerge waqıtta Çallıda 2230 çit il grajdanı räsmi terkälü uzğan. Şularnıñ yartısınnan kübenä 1400 militsiä tarafınnan aqçalata ştraf salınğan. Ämma, mäkkämä qararı belän 53 Rusiädän quıp çığarılğan. Qanun buyınça, andıylar 5 yıl buyına Rossiägä kerü xoquqın yuğaltalar ikän. Şuña da qaramastan, quyılğannar yaña dokumentlar yasap, qabat Çallığa kilälär. Şunısı ğäcäp, di Zäynäp xanım, bu oçraqlar çik buyında tügel, Çallı militsiäse tarafınnan açıqlana. Bıyıl, şähär migratsiä xezmätenä 629 keşe Çallığa waqıtlıça yäşäwgä röxsät sorap möräcäğät itkän, yañadan, 425 keşe Rusiä watandaşı bulırğa teläk beldergän. 14 avgustta Çallıda "Zakonsız migrant" operatsiäse başlandı häm töp yünäleş - tüläwle fatirlarda küpläp yäşäwçe çit il watandaşların açıqlaw bulaçaq. Bıyıl şuşındıy tulay toraqlarda yäşäwçelärgä 1mln.500 meñ sumlıq berketmä tözelgän. Operatsiä 28 avgustqa qädär baraçaq.
Çallı, Ğafiulla Ğaziz
