Accessibility links

җомга, 9 декабрь 2016, Казан вакыты 18:40

Liban ğäskäre ilneñ könyağına kerä, anda "tınıçlıq" köçlären dä kötälär


Pänceşämbedä Liban qorallı köçläre ilneñ ber ay elek İzrail höcümenä duçar bulğan könyağına kerä başladı. Xökümät anda yaqınça 15 meñläp ğäskärien urnaştırunı küz aldında tota. İzrail isä basıp alğan cirlärneñ öçtän ike öleşen inde azat itep, alarnı töbäktäge Berläşkän Millätlär köçlärenä tapşıruın äytä. Şul köçlär xäzer tağın da kiñäytelep, İzrail-Liban çigendäge solıxnı tä''min itärgä tieş bulaçaq.

Liban könyağına anıñ üz qorallı köçlären urnaştıru Berläşkän Millätlär yardämendä ireşelgän atışlarnı tuqtatu kileşendä qaralğan ide, xörmätle tıñlawçılar. Atnakiç şul eşkä kereşelde, tanklar häm timer tışlanğan maşinalar belän Liban ğäskäre Litani yılğasın kiçep, 1969-nçı yıldan soñ berençe märtäbä ilneñ könyağına urnaştırıla başladı.

Küplär öçen bu älege cirlärdä yañadan Liban däwläte suverenlığın torğızu bulıp tora - könyaq Libannı qayçandır İzrail basıp alğan ide, anda "Könyaq Liban Armiäse" dip atalğan xristian militsiäse östenlek itkän çor da buldı, 2000-nçe yılda İzrail annan kitkäç töbäk asılda şığıy möselmannarnıñ Xizbulla xäräkäte qaramağında qaldı häm İzrailneñ tönyağına raketa höcümnären ul näq menä şunnan alıp bardı, Liban könyağı Xizbulla nığıtmasına äylängän ide.

İzrail isä, ber ay elek başlağan hawa höcümnären tuqtatu şartı itep, üzeneñ Liban belän çiklärennän Xizbullanı alıp taşlawnı quydı. BMO aradaşlığı belän ireşelgän kileşügä ul şuşı törkemne qoralsızlandıru taläben dä kertmäkçe ide, ämma älegä moña ireşä almadı. İzrailneñ tışqı eşlär ministrlığı wäkile Mark Regev, üz ileneñ alğan yöklämälären bersüzsez ütärgä cıyınaçağın, ämma Libannan da näq şunı uq taläp itäçägen belderä:

"İzrail atışlarnı tuqtatu kileşendä alğan yöklämälären tulısınça ütiäçäk, häm bez Liban xökümäte dä näq şulay uq eşlär dip ömetlänäbez. Ul Liban könyağına üz ğäskärlären urnaştırıp, anda Xizbulladan azat cir buldırırğa tieş. Bu bezneñ teläk, bu kileşüdä qaralğan närsä", di İzrail tışqı eşlär ministrı wäkile.

Ul arada Liban ğäskäre pänceşämbedä berençe bulıp qısqa waqıtqa ğına İzrail köçläre tarafınnan yawlap totılğan Märcäyün şähärenä kerde. Ul şähär nigezdä xristiannar yäşägän töbäktä häm Xizbullanı yaqlaw anda yuq diärlek. Bäyruttağı xökümät könyaqta barlığı 15 meñläp ğäskäri urnaştırunı küz aldında tota. Älegä anda Berläşkän Millätlärneñ elekkedän qalğan 2 meñlek tınıçlıq saqlaw köçläre genä tora.

Atışlarnı tuqtatu kileşüendä isä şul da qaralğan - BMO köçläre kiläçäktä arttırılaçaq häm ul Liban armiäse belän bergä İzrail çige buyların qarap toraçaq. Ul arada Fransiä üzeneñ Libandağı xalıqara tınıçlıq köçlärenä citäkçelek itärgä äzer buluın äytä, biregä üz xärbilären cibärü telägen inde Yewropdağı qayber illär häm berniçä möselman däwläte belderde, di. Fransiä saqlanu ministrı Michelle Alliot-Marie:

"Zaruri närsä bulıp kiñäytelgän tınıçlıq köçlärendä Yewropadan mömkin qädär kübräk illärneñ qatnaşuı tora. Häm möselman illärennän dä bu näq şulay bulırğa tieş", di fransuz saqlanu ministrı.

Berük waqıtta Fransiä, könyaq Libandağı tınıçlıq köçläreneñ uñışı aña quyılğan maqsatlarnıñ açıq wä añlayışlı buluına bäyle, dip belderä:

"Ägär dä sez ğäskärne maqsatlarnı, mömkinleklärne açıq itep bilgelämi genä cibäräsez ikän, monıñ hälakätkä kiterüe bik mömkin, şul isäptän, andağı ğäskärilär öçen dä", dip kisätä Fransiäneñ saqlanu ministrı Michelle Alliot-Marie.

Berläşkän Millätlär aldağı 10-15 kön eçendä könyaq Libandağı tınıçlıq köçlärenä tağın 3 meñ yarım ğäskäri quşılaçaq, dip ömetlänä.

Kärim Kamal
XS
SM
MD
LG