Accessibility links

шимбә, 10 декабрь 2016, Казан вакыты 21:27

Çallıda säyäxät qärwanı


18 avgustta Almaniä firması "Sanrad Fabrik" belän "KAMAZ" tarafınnan oyıştırılğan avtomobil'' säyäxät kärwanı Çallığa kilep citte. Ul monnan öç atna elek Kuzbass töbäge başqalası Kimrawda başlanıp kitkän ide.

Bu xaqta "KAMAZ" mäğlümat säyäsäte departamentı baş belgeçe Cihanşin Fähim añlatma birde:

-Fähim, bu säfärneñ töp maqsatı närsädä, häm biredä nindi texnika qatnaşa?

-İke xezmättäş kompaniä bu säyäxätne üzläreneñ urtaq produktsiäsen täqdim itü häm qullanuçılarnıñ fikeren öyränü öçen ütkärä. Barlığı öç KAMAZ maşinası qatnaşa. Almannar alıp kilgän maxsus yarımtağılma da bar, ul "mäğlümat maşinası", yägni infomobil'' dip atala. Maşinalarnıñ härqaysına "Sanrad Fabrik" litsenziäse buyınça Çallıda citeşterelä torğan tizlek tartmaları quyılğan. Alarnı "KAMAZ" fänni-texnik üzäge häm Almaniä firması belgeçläre ozata bara. Mondıy prezentatsiälär Kimraw, Yaña Seber, Omsk, Tömän, Yekaterinburg, Çiläbe häm Ufa ölkälärendä ütkärelde inde. Tuqtalış yasalğan böten urınnarda da cirle eşmäkärlär, käsäçäçelär, transportçılar häm xakimiät wäkilläre belän oçraşular buldı.

-Alman firması belän küptän xezmättäşlek itäsezme?

-"Sanrad Fabrik" kompaniäseneñ Fridrixshafen şähärendäge töp bülekçese belän berençe bağlanışlar monnan 15 yıllar elek başlanıp kitkän ide. Alar "KAMAZ" texnikası üseşendä yaña säxifä açtı, disäñ dä bula. Almaniädä eşlängän tizlek tartmaları başta uzış maşinalarında qullanıla ide. Elegräk, älbättä, uñışsızlıqlar da bulğaladı. Läkin alman eşlänmäläreneñ soñğı buını yuğarı sıyfatlı bulıp çıqtı, "KAMAZ" uzışçılarınıñ bu tizlek tartmalarına qarata bernindi bernindi dä dägwa beldergännäre yuq.

Soñraq bu tizlek tartmaların yök maşinalarına da quya başladıq. Şuña kürä dä alarnı Çallıda citeşterü öçen kümäk ğamäliä buldıruıbız bik tabiği adım buldı. Bu ğamäliä bıltır 23 oktäberdä eşli başlağan ide. Küptän tügel genä ber meñençe tartmaçıq cıyıldı.

-Bu xezmättäşlek "KAMAZ"ğa nindi fayda kiterä soñ?

-Äytergä kiräk, ul ike yaq öçen dä faydalı. Ber yaqtan, "KAMAZ" üz maşinaları öçen zamança häm yuğarı sıyfatlı eşlänmälär ala, ä ikençedän, "Sanrad Fabrik" kompaniäse öçen "KAMAZ" dilerlıq häm servis çeltäre aşa Räsäy bazarına ütep kerü mömkinlege tua.

19 ında kärwan üz yulın Tübän Novgorodqa häm annarı Mäskäwgä qädär däwam itäçäk. Alar Rusiä başqalasına 27 nçe avgustta kilep citärgä tieşlär.

Ğafiulla Ğaziz, Çallı

XS
SM
MD
LG