Accessibility links

шимбә, 10 декабрь 2016, Казан вакыты 02:16

Barda rayonındağı bäyrämgä kittelär


Başqortstannan ber zur ğına törkem wäkillek comğa könne Perm krayenıñ tatarlar belän başqortlar yäşägän Barda rayonına säfärgä kitte. Anda beryulı ike tantana ütä. Rayonnıñ “Tañ” gäzite 18 avgustta üzeneñ 75 yıllıq yubileyen bilgeläsä, şimbä könne Barda rayonında yäşäwçe tatarlar belän başqortlar Tanıp digän borınğı awılnıñ 450 yıllığın bäyräm itäçäk. Başqortstan wäkillege menä şul bäyräm çaralarında qatnaşa. Respublika delegatsiäsenä Başqortstan Xökümäte qarşındağı Matbuğat, näşriät häm poligrafiä eşläre idäräse başlığı Boris Melkoedov citäkçelek itä. Mäğlüm buluınça, Bardadağı bäyrämnärgä Tatarstannan da küp kenä qunaqlar çaqırılğan.

Comğa könne qunaqlar “Tañ” gäzite yubileena bağışlanğan küp kenä çaralarda qatnaşa – fänni-ğamäli konferensiädä bula, gäzitneñ tarixın yaqtırtqan kürgäzmäne qarıy. Ä kiçen Barda Mädäniät sarayında sänğät ostalarınıñ zur konsertı bula. Anda Başqortstannan barğan cırçılar häm muzıkantlar da üzläreneñ mädäni programmasın täqdim itä.

Şimbä könne Başqortstan belän Tatarstannan barğan wäkilleklär Barda rayonınıñ Tanıp awılına bara häm anıñ 450 yıllıq yubiley tantanalarında qatnaşa. Anda da bixisap mädäni häm sport çaraları qaralğan. Ä inde bäyrämneñ yözek qaşı bulıp yubiley sabantuyı bulaçaq dilär.

XS
SM
MD
LG