Accessibility links

шимбә, 10 декабрь 2016, Казан вакыты 00:24

Ufada törki teatrlar festivale ütäçäk


Bu yılnıñ 12 sentäberennän 19 sentäbergä qädär Ufada törki telle teatrlarnıñ IV xalıqara festivale ütäçäk. “Tuğanlıq” dip isemlängän bu üzençälekle festival'gä Rusiä töbäklärennän, elekke soyuzdaş respublikalardan häm Törkiädän icat kollektivları kiläçäk. Bu xaqta jurnalistlar belän oçraşuda BR mädäniät häm milli säyäsät ministrı İldus İleşev xäbär itte. “Tuğanlıq – 2006” festivale Başqortstannıñ Russiägä quşıluına 450 yıl tulunı bäyräm itü qısalarında oyıştırıla.

Törki telle teatrlarnıñ “Tuğanlıq” xalıqara bäyräme 1991 yılda ütkärelä başlağan ide. “TÜRKSOY” xalıqara oyışması tarafınnan da xuplanğan bu festival'ne törki respublikalar teatrları täcribä urtaqlaşu, icat mäktäbe kebek qabul itte. Täwge yılnı uq bu sänğät bäygesendä 11 teatr kollektivı qatnaştı häm anda Çuaşstan däwlät akademiä drama teatrı ciñep çıqtı.

Başqortstan mädäniät häm milli säyäsät ministrı bıyılğı festival'gä Başqortstan Xökümäteneñ 3 million yarım sum aqça bülüen äytte. Rusiä dä şul uq külämdä bülärgä tieş bulğan, ämma nindider säbäp belän bu wäğdä ütälmäde, di İlişev äfände. Niçek kenä bulsa da, “Tuğanlıq” bäyrämen aldağı yıllarda da ütkärü kiräklegen äytä İldus İlişev. Bu berençe çiratta Başqortstan teatrların, häm başqort teatr sänğäten çit töbäklärdä dä tanıtu öçen kiräk, dip isäpli ul.

İlişev – Bu festival' bik möhim. Xäzerge globalizatsiä zamanında üzebezneñ milli teatrıbız sänğäten, üzebezneñ telne saqlap qalu öçen möhim. Bez üzebezdä genä tügel, başqa çit töbäklärdäge xalıqlar öçen dä yöz totarğa tieşbez.

“Tuğanlıq” törki teatrlar bäyrämenä çirattağı festival'gä dä sanawlı ğına könnär qalıp bara. Bu yulı da älege matur bäyrämdä 13 hönäri sänğät kollektivı qatnaşaçaq dip kötelä. Ämma qayber teatrlar älegä üzläreneñ kilüen raslamağan buluı açıqlandı. Matbuğat oçraşuında Başqortstannıñ Mädäniät häm milli säyäsät ministrı xalıqara teatr bäyrämeneñ 12 sentäber könne Mäcit Ğafuri isemendäge Başqort däwlät akademiä drama teatrı binası aldında, açıq hawada teatrlaştırılğan tamaşa belän açılaçağın äytte. Annan soñ şul könne kiçen bu teatr kollektivı tamaşaçılarğa üzläreneñ premyerasın – “Ural batır” eposı buyınça säxnäläşterelgän spektakl'ne kürsätä.

Törki teatrlar bäygesendä Ufa “Nur” tatar däwlät teatrı da qatnaşa. Nurlılar tamaşaçılar iğtibarına häm jyuri xökemenä “Ciznäkäy” spektaklen täqdim itäçäk.

İcat bäygesendä ciñüçelärne bronza sın häm törle külämdä aqçalata büläklär kötä. Älege bäyrämgä Mäskäwdän dä qunaqlar kilä, şul isäptän teatrlar häm kinematografiä eşläre öçen cawaplı Mixail Şvıydkoy da üzeneñ Ufağa kiläçägen äytkän.

XS
SM
MD
LG