Çallı mäktäplärendä uquçılar sanı yıldan-yıl kimi. Unarlap, yözläp tä tügel, uquçılar sanı meñärläp azaya. 2004 yılda Çallı mäktäplärendä uquçılar annan aldağı yıl belän çağıştırğanda 7 meñ balağa azaysa, 2005 yılda tağın 3600 kimi. Ä menä bıyıl mäktäplär 4 meñ uquçıların yuğalta. Bu sannar şähär mäğärif idäräse citäkçeläre qatnaşında ütkän matbuğat konferensiäsendä, Rämil Xälimov tarafınnan äytelde. Balalar sanı azayu 1990 yıllar axırlarında Rusiädäge iqtisadıy xälneñ naçar buluı, KamAZ zavodlarına eşkä kilgän xalıqnıñ demografiäse belän añlatıla.
Mäktäptä uquçılar sanı ni räweşle kimi, bu küreneş tatar mäktäplärendä dä küzäteläme? Azatlıq xäbärçeseneñ bu sorawına şähär mäğärif idäräseneñ milli bülek başlığı Viner Xämitov cawap birde:
-Qısqarular böten mäktäplärdä dä bara. Şulay da, ata-analar belän, tatar mäktäplärendä kisken qısqartularğa yul quymasqa tırışabız. Ämma barıber balalar sanı kimü küzätelä. Şuña da qaramastan mäktäplär sanı artıq azaymıy. Bez 2010 yılğa qädär şähär mäktäplären üzgärtü planın tözedek. Anıñ buyınça, köçsezräk mäktäplärne köçleräklärenä quşu protsessı bara.Sez Çallı mäğärif idäräseneñ milli bülek başlığı Viner Xämitovnnı işettegez.
Ä menä mäğärif idäräse başlığı Ramil Xälimov süzlärençä, mäktäplärdä uqıtuçılar probleması yuq. Eşkä kilergä teläwçelär bik küp, ä menä urınnar bik az. Säbäbe - bilgele, uquçılar sanı keçkenä bulğaç, uqıtuçılar da kiräk tügel.
Çallı, Ğafiulla Ğaziz
