Accessibility links

чәршәмбе, 7 декабрь 2016, Казан вакыты 21:41

Çallıda pensionerlar häm kommunistlar piketı


Çallı pensionerlarınıñ ber öleşe 24 avgustta şähär uramnarına çıqtı häm menä alda äytelgän qänäğätsezlek uñayınnan xakimiät binası yanında piket uzdırdılar. Alarğa kommunistlar quşıldı, tatar ictimaği üzäge wäkilläre dä kilde. Şiğar'lär, öndämälär küp törle ide häm arasında menä mondıyları da bar ide- "Pensionerlarga qarata terrornı tuqtatığız!", "Üzläreneñ ataların häm babaların yuqqa çığarğan rejim xakimiättän kitärgä tieş!" Bolar belän yänäşädä tatar häm urıs süzlären quşıp yazılğannarın da kürergä mömkin ide. Şularnıñ berse- "Awıl malayları! Ätiläregezne oyatqa qaldırmağız!" Şuşındıy öndämälärneñ kemgä atap yazılğanı täğäyen genä kürsätelmägän ide. Çallı tatar ictimaği üzägeneñ piket barışında yäşel älämnäre cilferdäp torsa da, millätkä qağılışlı şiğar'läre kürenmäde. Piketqa kilgän Nailä Fazlıyıva Azatlıq xäbärçesenä bolay dide:

-"Bez şundıy yul belän pensionerlarnı räncetü belän qänägät tügel. Pensiälärne xäzer şäxsi "Akibank" tarata häm tögäl waqıtları da yuq. Öydä bulmasañ, pensiäne ozın çiratlar torıp yullap alırğa turı kilä."

Bu- pensioner Nailä Fazlıyıva süzläre buldı. Kommunistlar älege çarağa şaqtıy äzerlekle kilgännär. Xakimiät binasınıñ här poçmağına ayırım keşelär quyğannar häm alar 3-4 törle listovkalarnı xakimiät binasına eşkä kilüçelärgä, yuldağı xalıqqa tarttılar. Älege listovkalarnıñ berse Çallı xoquq saqlaw oyışmalarınıñ 5 iyül könne komsomollarğa qarata qılğan ğämällärenä rizasızlıq belderü ide. Aldağı tapşırularda xäbär itkänebezçä, bu könne, San-Peterburda uzğan zur sigezlek sammitına qarşı aksiädä Çallı komsomolları da qatnaşırğa tieş bula, läkin alarnı 10-12 täwlekkä törmägä yabalar. Kommunistlar taratqan listovkalar arasında, 21 sentäberdän 8 oktäbergä qädär "Torğaw - 2006" iseme astında uzaçaq Amerika - Rusiä xärbi öyränülärenä qarşı yazılğannarı da bar ide. Älege listovkalarğa "Watan qurqınıç astında!" häm "Rusiä, Qırımnan ürnäk al!" NATO suğışçıların Rusiägä kertmibez!" - dielgän ide. Pensiä mäs’äläsenä kire qaytıp şunı äytep bula, şähär xäkime İldar Xalikov bu küreneştän qänägät tügel. Çärşämbe könne çıqqan atnalıq gäzit xäbärçesenä bolay di:

Min, monetizatsiädän soñ mondıy xällär qabatlanmas digän idem. Keşegä bağanağa qarağan şikelle qararğa yaramıy. Xalıqnıñ pensiä ala almawın belgäç, urındağı citäkçegä şaltırattım. Ul miña, İldar Şafkatoviç borçılmağız, ike aydan barısıda da tärtiptä bulaçaq",- dide. Şähär başlığı üz çiratında älege çinovnikka "3 kön eçendä pensiälär belän tärtip bulmasa, eşkä çıqmasañ da bula, dip cawap birä.

Çallı, Ğafiulla Ğaziz

XS
SM
MD
LG