Accessibility links

сишәмбе, 6 декабрь 2016, Казан вакыты 08:58

“Qazan” cır-biyü ansamble Semberdä xäyriä konsertı birde


Tamaşa Yaña şähärneñ “Ruslan” isemle mädäniät yortında uzdı. Çaqıru biletına iä bulğannar da konsertqa biletlar satıp alıp kerdelär – härkemneñ açılaçaq mäktäpkä üz öleşen kertergä tırışuı çatqısıdır inde monısı. Konsertnı alıp baruçı Aygöl Näbiullina anıñ maqsatın añlattı häm tamaşanı ana telenä bağışlanğan bik kürkäm şiğer belän başladı. Menä ber özek:

Äy sin telem, batır telem, ğorur telem

Cirdä yoldız bulıp balqıp torır telem,

Xalqım tele, xaq telem sin, yöräk telem,

Kiläçägem öçen mäñge kiräk telem.

“Qazan” cır häm biü ansambleneñ yuğarı sänğät ostalığı turında süz ozaytu da kiräkmider – ğomummäğlüm iç. Cırçılardın Mirsäyet Sönäğätullin, Göliä Möxämmätcanova, Liliä Mullağalieva, Röstäm Zakirov kilgännär. Boları da yarıysı ğına tanış. Ä menä şalyapinnarnıqıday tawışlı häm ütä dä milli moñlı Başqortstan yegete Röstäm Asaev semberlelär öçen zur açış buldı.

Tamaşada cır-iyüllär citdi süzlär belän çiratlaşıp bardılar. Açılaçaq mäktäp direktorı Älfiä Abutdinova mäktäptä eşläyäçäk östälmä fakul'tativlar, tügäräklär turında süz tottı. Añğıralatılğan ata-analar öçender inde, ana telennän başqa barlıq fännärneñ dä urısça uqıtılaçağına ayıruça basım yasadı. Soñraq säxnägä çaqırılğan “Sember” isemle maltabarlar berlege räise Färit Äyupov, Ölkäneñ Qanunnar çığaru cıyılışı deputatı Rasix Ğatawllin, İdelaryäğı rayonı avtonomiäse räise Rafail Näcmetdinov gubernator Morozovqa häm Tatarstan citäkçelegenä räxmät süzläre belderdelär. Tatarstannıñ yärdämnären dä sanap üttelär. Alıp baruçı Aygöl xanım ana telenä, milli moñıbızğa bağışlanğan tağın berniçä şiğer täqdim itte.

Konsert axırında Ölkä avtonomiäse räise Ramis Safin mäktäpkä aqçalata yärdäm itkän 40ка yaqın millättäşebezneñ isemnären sanap ütte, alarğa häm Qazannardan kilgän qunaqlarğa oluğ räxmätlären citkerde.

Konsert barışında “Tuğan tel” oyışması wäkilläre küptänge tanış cırçı Röstäm Zakirovqa tamaşanı xalqıbıznıñ gimnına äylängän “Tuğan tel” cırı belän tämamlawnı sorap möräcäğät ittelär. Häm ul ğına tügel – barlıq artistlar da, ayägürä basqan tamaşaçılar da zur kütärenkelek belän ber can-ber tändäy şuşı şuşı cırnı başqardılar. Qayber yomşaq küñelle babay-äbilärneñ küzlärendä yäşlär dä yaltıradı.

Ayrat İbrahim, Sember

XS
SM
MD
LG