Accessibility links

дүшәмбе, 5 декабрь 2016, Казан вакыты 15:29

İndependent Fidel Castro ğailäse yazmışı turında


İndependent gazetı bügen Kuba citäkçese Fidel Castronıñ berdänber xatını bulğan Mirta Diaz Balartnıñ 40 yıl cittä yäşägännän soñ Kubağa äylänep qaytuı häm Castro belän oçraşqan bulu mömkinlege turında yaza. 78 yäşlek Diaz Balartnıñ Castro belän ul Kubada xakimiätne üz qulına alğançı tuğan ulı Fidelitonı kürü öçen ilgä qaytuı mäğlüm. İndependent yazuınça Diaz-Balart eçägenä operatsiä säbäple uzğan ayda berençe märtäbä xakimiättän çitläşep torırğa mäcbür bulğan Castro belän dä küreşkän bulırğa mömkin. Zamanına Castronıñ başqa xatınnar belän xiänät itüenä cawap bularaq Diaz-Balart annan ayırılıp anıñ säyäsi qan doşmannarınıñ bersenä kiäwgä çıqqan. Şulay itep Castronıñ elekke xatını Emilio Nunez Blanco belän ul ülgänçegä qädär 40 yıl Madridta yäşägän. Nunez Blanco Castro köçläre tarafınnan xakimiättän töşerelgän Kubanıñ elekke diktatorı Fulgenico Batista tarafdarı ide. Kuba Prezidentı tağın 4 xatın-qızdan tuğan 8 balanıñ atası bula. Ämma Diaz-Balarttan soñ başqa beräwgä dä öylänmi dip yaza İndependent.

New York Times gazetı Malayziädä Xristian dinendäge keşegä kiäwgä çığu öçen möselmanlıqtan xristianlıqqa küçkän ämma ezärlekläwlärgä, mäxkamä yulın taptawğa duçar bulğan Lina Joy yazmışın sürätli. Joy 8 yıl elek ük dinen Xristianlıqqa almaştırğan bulsa da yaratqan keşesenä kiäwgä çığu öçen bik zur kirtälärgä yulığa. Mäxkamälär anıñ Xristianğa kiäwgä çığu xoquqın kire qağa. İslam ekstremisları dingä xiänättä ğäyepläp ülem belän yanağannan soñ xäzer Joy yäşerenep yäşärgä mäcbür. Üzen törle dinnärgä, malay, idnian, qıtay milli törkemnärenä çıdamlı bulğan urtaçıl häm zamança möselman ile dip isäplägän Malayziä öçen bu oçraq näfrät dulqını kütärelügä säbäp buldı dip yaza New York Times. 26 million keşe yäşägän Malayziäneñ 60-lap protsentın möselmannar, 20 protsentın buddistlar, 10-lap protsentın xristiannar häm 6 protsentın hindular täşkil itä.

Ukrainada ingliz telendä çığuçı Kiev Post gazetı da bügen millätara, xalıqara nikaxlar turında yaza. Anda Kievnıñ üzäk ZAGSınnan alğan mälümätlär kiterelä. Gazeta yazuınça Kievta millätara nikaqlar, bigräk tä afrikalılar, aziälelär häm yaqın-könçığışlılar qatnaşındağı nikaxlar haman da bik az bulıp qala birä, ämma 2001-nçe yıldan birle aqrınlap arta bara. Bıltır anda İranlılar qatnaşında 37, Paqstanlılar qatnaşında 13, süriälelär belän 10, Britannar belän 34 häm amerikannar belän 76 ğailä tözelgän. Kiev Post gazetı alğan mäğlümätlärgä qarağanda mondıy qatnaş nikaxlarnıñ 90 protsentında ukrain xatınnarı çit il irlärenä kiäwgä çıqqan.
XS
SM
MD
LG