Accessibility links

пәнҗешәмбе, 8 декабрь 2016, Казан вакыты 13:01

X Törek Qorıltayı Antalyada uzaçaq


Soñınçısı 5 yıl elek uzdırılğan Törek Qorıltayınınıñ 10-ınçısı 18- 20 Sinteberdä Antalyada uzdırılaçaq. Bu qorıltay soñgı biş yılda tieşle büdjet tabıla almaw arqılı uzdırıla almıy ide. Inde Premier Recep Tayip Erdoğan bu qorıltaylarnı oyıştırıp kilgän Törek Däwlät häm Cämğiätläre Duslıq, Tuganlıq häm Xezmättäşlek Fondına kiräk bulğan 800 meñ dolar çamasındağı budcetnı birgän. Xäzer inde Törek Qorıltayı şuşı fond belän Premier-ministerleq qarşındağı TİKA yäğni Törek Xezmättäşlek häm Täräqqiät Agenturası belän urtaqlaşa oyıştıraçaqlar.

Mäğlüm bu Törek Qorıltayınıñ berençese monnan 13 yıl elek 1993 yılnıñ 21-23 Mart tarixlarında şulay uq Antalyada Millätçe Xäräkät Partiäseneñ (MXP) legendar citäkçese märxum Alparslan Türkäş citäkçelegendä yasalğan ide. Berençe qorıltayğa Törki däwlätlärneñ citäkçeläre dä qatnaşqan, bu da Rusiäneñ “panturkizm qurqınıçı tuwa” digän protestlarına säbäp bulğan ide. Şuşı berençe qorıltayğa Tatarstannan kilgän delegatlar arasında Akademik Professor Mansur Xäsänov häm tel belgeçe Dr. Färit Xäkimcanov ta bar ide.

Läkin bu qorıltaylarda alınğan qararlarnıñ tik täqdimnär räweşendä qaluwı, yäğni eşlekle ber näticä çıqmawı säbäple Mäskäw dä soñğaraq bu qorıltaylarğa qul seltäp kenä qarıy başladı. Mäğlüm, törkilärneñ ber urtaqlığı bar: söylärgä, üzlären maqtarğa, ber-berenä büläklär birergä yaratalar, läkin soñında ällä nindi şaqqatırlıq eşlär ğämälgä aşmıy. Bu yulı da şundıyraq bulaçaq dip äytü öçen küräzäçe bulırğa kiräkmi. Tik ber ayırması bar, monı oyıştırğan MXP tügel, ä şuşı partiädän ayrılıp çıqqan AK partiä xakimiätennän elekke koaltsion xökümättä Törki Däwlätlärdän cawaplı däwlät ministere Prof. Abdülhalük Çay bulaçaq. 2001 yılda oyıştırılğan soñğı IX Törek Qorıltayına koalitsiä partnerı MXP liderı Däwlät Bahçeli xökümätneñ ekonomiä çaraları säbäple Çayğa tiyeşle aqçanı birmägäç, ul da ul çornıñ Prezidentı Demireldän tiyeşle budcetnı tapqan, anıñ şuşı adımı ministerlek postınnan yıraqlaştırıluwına säbäp bulğan ide. Antalyada Sintaber ayında uzdırılaçaq X Törek Qorıltayına törle yaqlardan 600-dän artıq delegat çaqırılğan.

Äxtäm İbrahim, İstanbul
XS
SM
MD
LG