Accessibility links

дүшәмбе, 5 декабрь 2016, Казан вакыты 13:36

Tatar keşesenä Omski ölkäsendä yäşäw ciñelme?


“Üsep citkäç çit cirlärdä yörtä bezne yazmışlar” dip cırlarda cırlanğança, elekke tapşırularıbıznıñ bersendä “Azatlıq” tıñlawçıların eş ezläp Portugaliägä barıp çıqqan ber millättäşebez belän tanıştırğan idek. Qısqaça ğına iskä iskä töşerep kitkändä, Omski ölkäseneñ tatar awıllarınıñ bersendä uqıtuçı bulıp eşlägän İldar Mamatov, balalarına yuğarı belem birü mömkinlege buldıru maqsatı belän rayon üzäge bulğan Tara şähärenä küçep kilä. Añlaşıla ki, awıldağı yortın satıp qına, ul şähärdä fatir ala almıy. Fatirlıq aqça eşläw öçen aña çit illärgä çığıp kitärgä turı kilä. Törle awırlıqlar kiçerep ul Portugaliägä barıp citä, anda yäşeren räweştä diärlek eşkä urnaşa. Bu ildä öç yılğa yaqın eşlägännän soñ, berniqädär aqça tuplap, ilenä qayta. Cıyılğan aqçağa Tara şähärendä 3 bülmäle fatir satıp ala.

Bu waqiğalardan soñ inde 4 yılğa yaqın waqıt ütep kitte. Bügenge köndä İldar Mamatov qayda, niçek yäşi, ilenä qaytqaç ğailäsen asrarlıq eş taba alğanmı, nilär kiçergän, nindi sınawlar ütkän? Küptän tügel genä miña İldar belän oçraşıp, bu sorawlarnı anıñ aldına quyu mömkinlege tudı. Tarada ul hönäre buyınça eş taba almağan. Ber yılğa yaqın miç yağuçı bulıp eşlägännän soñ, başqalar kebek eş ezläp, Tömän ölkäsenä kitkän. Ämma, tönyaqta da eş tä artıq keremle bulmağan. “Ber ay tülilär, ber ay äz genä, qaysında tülämilär dä, şuña kürä iptäşlärem belän kire qaytırğa turı kilde,”-dip söyli İldar. Qaytqannan soñ İldar Omskiğa barıp qarağan, ämma anda da eş taba almağan. Annan soñ aña Tarada açılaçaq “Duslıq Yortında” eş täqdim itälär. Häm ul anda metodist bulıp eşkä kerä. “Mädäniät eşe miña yaqın, zur bulmağan xezmät xaqına eşläp yörim, tatarlıq qalsın dip,”- di ul.

Şulay itep, İldar Mamatov Tara şähäreneñ milli oyışmaların berläşterüçe “Duslıq yortında” eşli başlağan. Bügenge köndä dä ul anda eşli. İldarnıñ Tara şähärendäge tatar oyışmaları eşendäge qatnaşlığı turında ayırım äytergä kiräk. Ul “Nur” isemle tatar üzägen oyıştıruçılarnıñ berse dä, şul uq isemdäge fol'klor ansambl'neñ aktiv äğzası dä, balalar sänğät üzägendä nänilärgä milli tärbiä birüçe dä.

Tara rayonında milli bäyrämnärne, konsertlarnı oyıştıruda da ul başlap yörüçe. Milli xäräkättän başqa üzeneñ tormışın ul küzallıy da almıy.

İldarnıñ ğailä tormışında da berniqädär üzgäreş bar. İke qatlı yorttağı fatirın satıp ul, xosusıy yort satıp alğan. “Üz yort-cireñ belän yäşägändä, ber yaqtan, baqçada ciläk-cimeş, yäşelçä üsterep, qoş-qort ürçetep, ğailä byudjetına az bulsa ciñellek kilsä, ikençe yaqtan balalar da eşkä öyränep üsälär” – di ul.

Menä şundıy sikältäle yullar ütep, törle sınawlar kiçerep, tormışta üz urının tapqan diärgä mömkin millättäşebez İldar Mamatov turında. Kiläçäktä ul Tara tatarlarınıñ şähär tormışında totqan urınnarınıñ nığıy baruına ömet bağlıy. Üzeneñ tormışınıñ da millätkä xezmät itügä bäyle bulaçağına inana.

Saniä Mirxaleewa, Omski

XS
SM
MD
LG