Accessibility links

якшәмбе, 4 декабрь 2016, Казан вакыты 11:25

New York Times: Çeçnädä yuğalğan jurnalist Elina Ersonoyeva - Basayevnıñ yäşeren xatını


Çeçnä Başqalası Groznıyda qorallı bilgesez keşelär tarafınnan alıp kitelgän jurnalist Elina Ersenoyeva turında xoquq yaqlaw oyışmaları cañ suqqanda anıñ tormışınıñ hiç tä kötelmägän yaqları açıldı. Xoquq yaqlaw oyışmalarına üzeneñ häm ğailäseneñ Çeçen premyer ministrı Ramzan Qadirov köçläre tarafınnan ezärleklänüe turında xat yazğannıñ ikençe könendä 17-nçe avgustta alıp kitelgän Ersenoyeva terrorçı Şamil Basayevnıñ yäşeren xatını bulıp çıqtı. Şul turıda New York Times häm Moscow Times gazetları üzläreneñ 28 avgust sanında yaza.

Keşe xoquqların yaqlaw oyışmaları tarafınnan Çeçnädäge başqa küp kenä keşelär kebek Qadirov köçläre alıp kitkän dip isäplänelgän 26 yäşlek jurnalist häm cämäğät eşleklese Arsenoyeva ike tormış belän yäşägängä oxşıy dip yaza New York Times gazetı.

Cämäğät eşçänlegennän tış ul 11 yüldä şartlaw näticäsendä ülgän Çeçen terrorçıları citäkçese häm Rusiädä iñ nıq ezlänelgän keşe Şamil Basayevnıñ yäşeren xatını da bulğan dielä gazetta.

Anda şulay uq Elinanıñ anası Rita Ersonoyeva belän yuğalğan qızı turında äñgämädän özeklär dä kiterelä. Anası äytüençä, Elina Basayevqa üz teläge belän tügel, ä Elinanıñ 2 ir tuğanın üterü belän yanaw säbäple kiäwgä çıqqan.

Elina Basayev belän berençe märtäbä uzğan yılnıñ Noyäberendä oçraşqan. Ul çaqtağı Çeçen separatistları prezidentı Abdul Xälim Sadullayevnıñ xatını Xida Sadullayeva Elina ber suğışçığa kiäwgä çığarğa tieş, ul keşeneñ iseme Ali-Xan Äbü Yazidov digän.

Ersenoyeva rizalaşqan. Kazbek isemle maşina yörtüçe anı Groznıy yanındağı Starie Atagi awılınnan alıp kitep Groznıydağı ber yortqa kitergän. Kiäw sine kötä dip anı ber bülmägä kertep cibärgännär häm anda Elina Basayevnı kürgän di Elinanıñ anası.

Añarçı 3 xatını bulğan Basayev belän Elina arasında tiz genä nikax uqılğannan soñ alar anda 3 kön bergä bula, şunnan soñ Basayev aña İnternetta törke eşlär eşlärgä quşa.New York Times yazuınça Rita Ersenoyeva şulay uq Kazbeknıñ Elinanı şunnan soñ 3 ayda 3 märtäbä alıp kitüe, şunıñ belän oçraşularnıñ betüe turında da söylägän.

Moscow Times yazuınça Elina üzeneñ häm ğailäseneñ mart ayınnan birle Ramzan Qadirov köçläre tarafınnan ezärleklänüe turında xalıqara xoquq yaqlaw oyışmalarına xat yullağan. Ul xatta ul ber ay elek ireneñ üterelüenä qaramastan üzen häm ğailäsen ezärlekläwlärneñ tuqtalmawı turında yaza. İreneñ isemen atamıy ğına tärtip saqlaw oyışmaları minem irem ğisyançı bulğanğa kürä bezgä qıynawlar häm ülem belän yanıy dip belderä. Ersonoyeva xatında şulay uq "Ul çor eçendä alar minem äniemne berniçä märtäbä alıp kitep qatı qıynadılar, aña yanadılar dip yaza.

Moscow Times Elina Ersnoyevanıñ niçek alıp kitelüen dä sürätli. 17 avgustta irtänge 9-da suğış kiemendäge häm bitlekle qorallanğan berniçä keşe Ersonoyevanı häm anıñ apası Rovzannı başlarına qapçıq kigerep ikesen 2 maşinağa utırtıp alıp kitkän. Soñraq apasın qaytarıp cibärgännär. Kiçke cidedä Elina anasına şaltıratıp tizdän azat iteläçäge turında äytkän. Ämma şunnnan soñ bügengä qädär annan ber xäbär dä yuq.
XS
SM
MD
LG