Accessibility links

якшәмбе, 11 декабрь 2016, Казан вакыты 09:16

Salawatnıñ duslıq köymäse


Qazanlılar, İdel buylap Bolğarğa säyäxät itüçe Başqortstan tatarların, Yılğa portında qarşıladılar. Bolğar säfärenä Ufadan İdel buylap Ğ.Tuqay teploxodında säfär çığuçı millättäşlärebez turında bezneñ radio tıñlawçılarıbız inde işetkän ide. Menä irtä belän bügen bu teploxod Qazannıñ Yılğa portına kilep tuqtadı.

Qazan şähäreneñ Yılğa portında säfärçelärne,Tatarstan respublikasınıñ mädäniät ministrlığı “Xalıq icatı” metodik üzäge , Tatarstan Yazuçılar berlege, qotlaw süzläre belän häm cırlar- iyüllär , häm ballı- tatlı çäk-çäk belän qarşı aldılar. Salawat Fätxetdinovnıñ icatına bağışlap oyıştırılğan bıyılğı Bolğar säyäxätenä çığuçılarnı Qazanda qarşılarğa Robert Miñnullin,Tufan Miñnullin da kilgän ide.

Tantananı alıp baruçı Fäniä Xäsänova, Tatarstan mädäniät ministrlığınıñ bülek mödire Räysä Safiullinağa süz birde. Ul üz çığışında säfärgä kilüçelärgä Qazannıñ iñ matur urınnarına, yäğni Kreml'gä, Qol Şärif mäçetenä “Tuğan awılım” küñel açu kompleksına ekskursiä täqdim itülären belderde.

Tatarstannıñ xalıq şağire, däwlät sovetı deputatı Robert Miñnullin bolay dide:

“Bıyıl bez yaqtaşıbız cırçı, häm cämäğät eşleklese Salawatnı qarşı alabız . Ul bezneñ iñ kürenekle şäxeslärebezneñ berse, iñ aktiv tatar keşese. Salawat bıyıl üzeneñ tuğan awılında, Aq säyettä Tatarstannıñ mädäniät häm sänğät bäyrämen uzdırdı. Anda Udmurtiädän, Sverdlovskidan , Permnän - barısı 5-6 meñ keşe qatnaştı. Bu , siña Başqortstan xalqınıñ Salawatqa bulğan räxmäte itep qabul it.”

Yazuçı , dramaturg Tufan Miñnullin üz çığışında bu säyäxätne xuplap, anıñ kiläçäge turında qayğırtıp, bu säyäxätkä başqa töbäklärdän dä çığıp tatarlar quşılsınnar ide”,- dide.

“Ramazan” cämğiäte citäkçese Marat Şäripov

Salawat Fätxetdinovnıñ icatına häm anıñ qılğan xäyriä eşlären istä totıp, aña Başqortstan xalqı isemennän räxmäten belderde.

Säfär qıluçılar Salawatqa, Qazanğa büläk itep maxsus biyü alıp kilgännär. İyünne Başqortstan älämen kütärep Başqortstannıñ xalıq artistçası Zölfiä Kudaşeva başqardı.

Salawat Fätxetdinov üz çığışında bolay dide :

“ Minem ğadi genä xezmätemne şulay zurlağanığız öçen üzegezgä zur räxmät. Bu säyäxät bulıp torsın, tatarda talantlar citärlek. İsännären dä, ülgännären dä xörmätläp yäşik. Marat äytmeşli: “Bergä yäşik! Üzemnän östäp şunı äytim: “Ayırım torıyq!”

Bik ğibrätle dulqınlandırğıç oçraşu buldı bu . Marat Şäripov Salawatqa bağışlanğan cırın başqarğanda Salawat Fätxetdinov qızarıp, tirläp çıqtı, annan ul räxätlänep kölä başladı. İke respublikada da ataqlı Salawatnı zurlaw , duslıqnı zurlaw häm tatar zıyalılarınıñ talantlı fidaqär'lären tanu bäyräme buldı bu irtädä. Ni qızğanıç, yözlägän mosafir Yılğa portına kilgäç, alarnı qarşı alırğa berniçä kürenekle ädip, häm şähärneñ Ximiklar mädäniät sarayınıñ Nikolay Kretov citäkçelegendäge “Yäşlek” biyü ansamble häm şulay uq mädäniät ministrlığı wäkilläre genä buldı.

Ä matbuğatta bu oçraşunıñ waqıtı turında aldan äytelmäde, diärlek. Bu xaqta Rinat Sibğatullin abıy Azatlıq xäbärçesenä menä närsä dide.

“ Bik oşadı . Ämma qazan xalqınnan min genä buldım disäm dä yarıy. Ber keşe dä yuq. Monda qarşı aluçı ähellär genä, jurnalistlar, yazuçılar ğına. Çönki mäğlümat yuq, bernindi mäğlümat yuq” .

Ä kiçen Ğ.Tuqay köymäsendä Ufadan säfärgä kilüçelär Qazan zıyalıları belän oçraşqannan soñ Çallığa yul tottı.

Mälikä Basıyr

XS
SM
MD
LG