Accessibility links

шимбә, 10 декабрь 2016, Казан вакыты 00:21

Belgeçlär fikerençä, Törkiädäge Kördstan İreklek Laçınnarı törkeme - PKKnıñ şähärdäge qanatı


Soñğı 3 köndä Törkiäneñ Urta diñgez yar buylarında häm İstanbulda berniçä bomba şartladı. Düşämbe könne Antalya şähärendäge şartlawda 3 törek hälak buldı, distälärçä keşe, şul isäptän İran, rusiä, İzrail häm Germaniä turistları yaralandı. Şartlawlar öçen cawaplılıqnı üz östenä Kördstan İreklek Laçınnarı dip atalğan törkem aldı. Britaniädä çığuçı The Economist jurnalınıñ Törkiä xäbärçese Azatlıq radiosına älege törkem häm anıñ maqsatları turında söyläde.

Kördstan İreklek Laçınnarı Törkiädä berençe märtäbä cämäğätçelek iğtibarın 2004 yılda cälep itte. Ul çaqta kiñräk mäğlüm ikençe ber körd törkeme Kördstan Eşçelär Firqäse PKK 5 yıl tınlıqtan soñ höcümnären yañartuı turında belderde. PKK Törek xökümättennän säyäsi çigeneşlärgä ireşä almawın añlağannan soñ ilneñ könyaq-könçığışnda Törek iminlek köçlärenä qarşı höcümnären yañartuın iğlan itte.

The Economist basmasınıñ İstanbuldağı xäbärçese Amberin Zaman Azatlıq Radiosına "Küpçelek terrorçılıq belgeçläre Kördstan İreklek Laçınnarı barı tik PKKnıñ şähärlärdäge qanatı ğına dip isäpli. Yäğni PKK Törek iminlek köçlärenä awıl cirlärendä höcüm itsä, boları şähär cirlärendä, ilneñ könbatışında, İstnbul, Ankara, İzmir kebek zur şähärlärdä tınıç xalıqqa höcümnär oyıştıra. Alar PKK belän bäyläneşlären buluın kire qağa. Ämma alar PKK citäkçelegendä eşli dip kiñ tanılğan häm şulay qabul itelä" dide.

Küptän tügel İreklek Laçınnarı üzläreneñ internet säxifäsendä Törkiä turizmın häm iqtisadın töp hädäflär dip atadı. Törkiä iqtisadı turismnan kilgän aqçalarğa bik nıq bäyle. Bıyıl Törkiä xökümäte turismnan 20 milliard dollar aqça kiler dip ömetlängän ide. Zaman äytüençä, xökümät ul maqsatında ireşä almas kebek. Soñğı könnärdä Antalya, Marmaris kebek türizm üzäklärendä bulğan şartlawlar İreklek Laçınnarınıñ kisätülären tormışqa aşıruı bulırğa oxşıy.

Zaman İreklek Laçınnarınıñ taläpläre turında "Alar ğömümän alğanda bu höcümnär Törkiä armiäseneñ Körd xalqına qarşı operatsiäläre öçen üç alu dilär. Törek däwläteneñ körd xalqına qarata räximsezlegenä qarşı köräşülären belderälär. Törkiä ilneñ könyaq-könçığışnda Kördlärgä qarşı suğışnı tuqtatmıy torıp, totqınlıqtağı PKK citäkçese Abdulla Öçalan irekkä çığarılmıy torıp, kördlärgä tulı mädäni häm säyäsi xoquqlar birelmi torıp tuqtmayaçaqları turında äytälär" dide.

Zaman äytüençä, Kördstan İreklek Laçınnarı törkemendä niçä keşe buluın beräw dä belmi. Häm alarnıñ PKK belän elemtäläre dä açıq tügel. Şuña kürä PKK suğışçıları şähärgä kilep höcümnär oyıştıra da İreklek Laçınnarı iseme astında cawaplılıqnı üz östenä ala dip uylarğa da nigez bar. Şulay uq şähärlärdä alarnıñ tarafdarları bar dip uylarğa da bula di Zaman.

Anıñ fikerençä, İreklek Laçınnarınıñ texnik yaqtan kamil bulmağan, az aqça totılğan höcümnäre PKKnıñ köräş ısulların üzgärtüe belän bäyle bulğanğa oxşıy. Yäğni Oçalannıñ qulğa alınuınnan, PKKnıñ awıllardağı yardäm çeltäre tar mar itelüennän soñ PKKnıñ köräş mömkinlekläre nıq kimü säbäple ul kübräk şundıy yäşeren höcümnär ısulına küçkän bulırğa mömkin. "Ğömümän PKK üze dä höcümnärne yañartuın iğlan itkännän soñ iminlek köçläre belän açıqtan-açıq bäreleşlärgä barmıyça çittän şartlatu, cir minaları quyu ısulına küçte" di Zaman.

Naif Aqmal, Praga.
XS
SM
MD
LG