Accessibility links

чәршәмбе, 7 декабрь 2016, Казан вакыты 21:42

Beslan mäktäbendä berençe şartlawnı kem başqarğan? Yaña bäysez xisap


1 Sintäberdä Beslan faciğäsenä 2 yıl tula. Düşämbedä Rusiä matbuğatında Duma deputatı, ğalim Yuri Savelyevnıñ şuşı faciğä turında möstäqil xisabı dönya kürde. Räsmi qaraştan bik nıq ayırılıp torğan bu xisap zur şaw-şuğa säbäp buldı. Beräwlär, bigräk tä räsmi añlatmağa ışanmawçılar, anı xuplap qarşı alsa, ikençelär tänqit belderä.

2004 yılnıñ 1 sintäberendä Tönyaq Osetiäneñ Beslan şähäre mäktäbendä ğisyanşılarnıñ meñnän artıq keşene totıq itep alu faciğäse öçençe köngä maxsus köçlärneñ höcüme belän tämamlandı. Berniçä säğät däwam itkän mäşhärdä 330dän artıq keşe häläk buldı, yartısınnan kübräge balalar.

Räsmi añlatmağa kürä, höcümgä säbäp bulğan berençe şartlawnı mäktäp eçendäge ğisyançılar başqarğan, maxsus köçlär qullanğan qoral binanınñ yanıp kitüenä säbäp bulmağan. Duma komissiäse räise Aleksandr Troşin bu räsmi xisabın sintäberdä iğlan itergä cıyına.

Ul arada şul uq komissäneñ äğzası, yanu häm şartlaw fizikası belgeçe, professor Yuri Savelyev üz xisabın bäyän itte. 700 bittän, 300 fotoräsemnän torğan bu xisapnıñ özeklären düşämbedä Novaya gazeta basması häm İnternettağı Pravda Beslana säxifäse bastırdı.

PravdaBeslana.Ru möhärrire Marina Litvinoviç Azatlıq xäbärçesenä bolay dide:

"Xisapnıñ töp näticäse berençe şartlawlarğa qarıy. Savelyev şundıy näticägä kilgän: mäktäpkä berençe häm ikençe atular çittäge binalardan, RPO-A häm RŞG qorallarınnan başqarılğan" di Pravda Beslana möhärrire.

Yuri Savelyev Exo Moskvı radiosına äytüençä, başta ul tikşerülären berençe ike şartlaw sportzalda bulğan, ğisyançılar üzläre yasağan şartlatqıçlar şartlağan digän fikergä tayanıp başlağan. Ämmä fänni dälillär monı isbatlamağan.

Monnan tış ğalim süzlärençä, isän qalğan totıqlar şartlawlar binanıñ ber başında buldı dip söyläsä, räsmilär bötenläy ikençe başta di.

Savelyev şundıy näticägä kilgän: räsmilär höcüm başlarğa qarar itkän, läkin anı ğisyançılarnıñ ğämälenä cawap itep kürsätergä telägän.

Tönyaq Osetiä parlamentı räise urınbasarı, Beslan faciğäsen tikşergän cirle komissiä citäkçese Stanislav Kesaev Savelyev xisabına yuğarı bäyä birde. Beslan Anaları komitetı Savelyev xisabı komitetnıñ üz xisabına yaqın, dip belderde. Beslan jurnalistı Murat Kuboev Azatlıqqa bolay dide:

"Beslan Anaları komitetı häm Beslan Awazı Savelyevqa zur ömetlär bağlağan ide. Maxsus xezmätlärneñ, totıqlarnıñ ülemendä ğäyeple ikänen bez küptän beläbez. Belä torıpmı, belmiçäme, anısı möhim tügel. Läkin Baş prokuratura şahitlärneñ kürsätmälären kire qağa" di Beslan jurnalistı Murat Kuboev.

Şul uq waqıtta Savelyev dälillären kire qağuçılar da bar. Şul uq Duma komissiäse äğzası Arkadi Baskaev Exo Moskvı radiosına bu anıñ şäxsi qaraşı, ul çın waqiğalarğa nigezlänmägän dide.

16 Awgustta Beslan mäktäbendä cäräxätlär alğan tağın ber keşe häläk bulğannan soñ, Beslan qorbannarı sanı 332gä citte.

Ali Ğilmi
XS
SM
MD
LG