Accessibility links

пәнҗешәмбе, 8 декабрь 2016, Казан вакыты 19:18

Madonna konsertı Mäskäwdä dä bäxäslär uyata, xakimiät älegä tamaşa urının üzgärtä


Suğışlar, terror qurqınıçı, şartlawlarğa qaramastan dönya küñel açunı da onıtmıy, xörmätle tıñlawçılar. Yewropa, misal öçen, mäğlüm cırçı Madonna tamaşaları belän yäşi. Anıñ konsertı Mäskäwdä dä uzaçaq. Başta ul Rusiä başqalasınıñ Çıpşıq tawında - Vorobyevı Gorıda sintäbrneñ 11-endä çığış yasar dip planlaştırılğan ide, ämma xakimiät tamaşanıñ waqıtın da, urının da üzgärtergä buldı - Madonna konsertı 12-nçe sintäbrgä Lujniki stadionına küçerelde.

Ser tügel, cırçı bularaq ta, ğomumän sänğätkär bularaq ta Madonna xalıq arasında şaqtıy qarşılıqlı fikerlär uyata torğan ber şäxes. Anıñ bıyılğı konsert turı 1989-nçı yılda çıqqan "Like a prayer"-"Ğibadätçe kebek" digän hitın qabatlıy. Yäğni isemennän kürengänçä, dini mäs''älägä bäyle kilep çığa.

48 yäşlek cırçı öçen andıy bäyläneş yaña närsä tügel, üzeneñ ğämälläre belän Madonna xristian dönyasın inde küptännän teträtep kilä. Bıyılğı tur da çığarma tügel. Qayber illärdä tamaşaçı monı inde kürde dä - Londonda, Rimdä, Parisdä häm tağın berniçä şähärdä uzğan konsertlarda Madonna üzen täregä qağu säxnäsen kürsätte. Äle ber ildä, äle ikençesendä pravoslav ruxanilär üz ömmäten Madonna tamaşalarına barmasqa öndi.

Şuşı öndämälärgä xäzer inde Urıs pravoslav çirkäwe dä quşıldı. Ämma Madonna oçrağında anı kire qağuğa çaqırular da kiresençä anıñ faydasına ğına bula kebek. Tamaşalar oyıştıruşı Anton Antraşkin radiobızğa, cırçınıñ Rusiädä bulaçaq berençe konsertına inde 35 meñ bilet satıldı, dip belderde:

"Urıs pravoslavlarına kilgändä şunı äytä alam - konsertnı oyıştıruçılar baştan uq üzläreneñ pravoslav çirkäwe qaraşına xörmät belän qarawın belderep kilde. Madonna konsertın qabul itä almağannar aña barmas qına dip uylarğa bula", di Anton Antraşkin.

Ämma Madonna konsertı tiräsendäge qarşılıqlar monıñ belän genä betmi. Atna buyı barğan bäxäsle söyläşülär näticäsendä oyıştıruçılar konsert urının da üzgärtergä mäcbür qaldı. Başta ul açıq hawada, Mäskäwneñ Çıpçıq tawlarında uzar dip planlaştırılğan ide. Ämma militsiä xäzer, anda cıyılğan xalıqnı kontrol'' itü mömkin tügel, şuña da tamaşa iminräk urında uzarğa tieş, dip belderä.

Berniçä başqa urın tikşerelgännän soñ konsertnı Lujniki stadionında ütkärü xaqında kileşende, ämma bu aldan qaralğança sintäbrneñ 11-endä tügel, ä 12-sendä bulaçaq. Konsert urını säbäple kilep tuğan bilgesezlek, Madonna üzeneñ Mäskäw tamaşasınnan ğomumän waz kiçä ala digän qurqular uyatqan ide.

Mäskäw konsertı planlaştırılğanda Madonna anı Qızıl mäydanda ütkärü telägen dä beldergän ide, tik Mäskäw xakimiäte soñğı yıllarda Rusiäneñ şuşı töp mäydanın sänğätkärlärgä birergä bik telämäwen kürsätep kilä. Qızıl mäydanda üz konsertın bıyıl yül ayında mäğlüm cırçı Eric Clapton ta oyıştırmaqçı ide, läkin xakimiät aña rizalıq birmäde, Clapton üzeneñ Rusiädäge konsertınnan ğomumän baş tarttı. Şuña kürä, Qızıl mäydanda cırlıy almağan Madonna üzen cünle keşelär arasında xis itä ala...

Kärim Kamal
XS
SM
MD
LG