Accessibility links

чәршәмбе, 7 декабрь 2016, Казан вакыты 11:42

"Berdäm Rusiä" tatarlardan qurqamı?


Sverdlovski ölkäsendäge säyäsi wazğiät soñğı könnärdä iğtibar üzägenä mende. Üktäber başında uzaçaq ölkä Duması deputatların saylaw aldı kompaniäse başınnan uq ğauğalı başlandı.

Mäğlüm bulğança, küp kenä töbäklärdän ayırmalı bularaq, Sverdlovski ölkä Zakonnar cıyılışı ike palatadan tora. Anıñ berse – wäkillär palatası, yäğni ber mandatlı okruglardan saylanğan deputatlar, ikençese – tübän palata – törle säyäsi partiälär isemlegendä saylanğan deputatlar.

Tübän palatada eşläwçe ölkä Duması deputatlarınıñ yartısı här ike yıl sayın saylanıp tora. Bu közdä Sverdlovski ölkäsendä menä şuşı zur säyäsi waqiğa bulıp uzarğa tieş.

Xakimiät partiäse bulıp sanalğan “Berdäm Rusiä” partiäse, härwaqıttağıça, barlıq administrativ resursların eşkä cigep, üz aldına başqa partiälärne mömkin qädär azraq sanda Dumağa ütkärü burıçın quydı. Däwlät Duması deputatı, “Tormış” partiäseneñ Sverdlovski ölkäse bülege citäkçese Yevgeniy Royzman äytüençä, ölkädäge barlıq şähär başlıqların, xalıq arasında abruylı bulğan mäğärif häm meditsina xezmätkärlären soñğı könnärdä “Berdäm Rusiä” partiäse dissiplinası buyınça yäşärgä mäcbür itep, alar aldına xucalıq eşlären alıp baru buyınça da ber genä şart quyalar.

“Bu xäl miña KPSS çaqlarınıñ iñ yaman waqıtların xäterlätä, - di Yevgeniy Royzman, - ber genä ayırma – KPSS citäkçeläreneñ bolay ayırmaçıq kürenep torğan säyäsätne käsepkä äwerelderü yunäleşe yuq ide”.

Mäskäw aldında üz yoğıntıların köçle itep kürsätergä künekkän ölkä citäkçeläre häm çinovniklar bu eştä iñ pıçraq alımnarnı qullanudan da çirqanmıylar. Şularnıñ berse konkret eşläre belän moña qädär üzlären xalıq aldında kürsätep ölgergän, kiläçäktä dä konstruktiv räweştä eşli alırday keşelärne üz isemlegenä kertkän “Tormış” partiäsen, yuq säbäplärne bar itep, saylawda qatnaşu öçen terkäwdän baş tartu buldı.

Bu waqiğa ölkä külämendä, bigräk tä san yağınnan ikençe urında torğan tatar xalqı arasında zur yañğıraş taptı häm küplärneñ rizasızlığın tudırdı. Ni öçen digändä, “Tormış” partiäse isemlegeneñ öçençe urınında ölkä tatarları arasında eşlekle, ğädel, köçle şäxes bularaq bilgele bulğan Rinat Sadriev quyılğan ide. Bu inde, ägär dä “Tormış” partiäse ölkä buyınça iñ kimendä cide protsent tawış alıp, kiräkle kirtäne uzsa, Rinat Sadriev ölkä Duması deputatı bulıp eşli alaçaq häm üzeneñ tınğısız, eşlekle xolqı belän tatar xalqına küp yärdäm kürsätä alaçaq digän süz. “Tormış” partiäseneñ Sverdlovski ölkäse bülege citäkçese, Däwlät Duması deputatı Yevngeniy Royzman fikerençä, “Berdäm Rusiä” partiäse isemlegendägelär menä şul zur köçtän – tatar xalqınıñ berdämlegennän, üz keşese kergän partiä öçen tawış birüennän qurqıp, bu partiäne bötenläy ütkärmäs öçen tırışalar.

Rinat Sadriev üze moña qädär tatar xalqına eşmäkär bularaq, Sverdlovski ölkäsendä küp kenä milli eşlärne alıp baruçı Milli media-xoldingnı ğämälgä quyuçılarnıñ berse bularaq yärdäm itep kilde. Ä säyäsätkä kilüen ul millätlärneñ milli añın üsterüne däwlät säyäsäte däräcäsenä kütärer waqıt citüe belän añlata.

“Tormış” partiäseneñ Sverdlovski ölkäsendäge saylawlarda qatnaşa alu-almaw mäsäläsen bu könnärdä sud xäl itäçäk. Sverdlovski ölkä sudı obyektiv qarar qabul itmäsä, partiä citäkçeläre Mäskäwgä, Yuğarı sudqa möräcäğät itärgä cıyınalar.

Fäwiä Safiullina, Yekaterinburg

XS
SM
MD
LG