Accessibility links

шимбә, 10 декабрь 2016, Казан вакыты 00:28

Çallıda milli xäräkät canlana


Respublika köne uñayınnan Çallıda älläni zur çaralar ütkärelmäde. Sişämbe könne, şuşı uñaydan bik zur çäçäklär kürgäzmäse açıldı, çärşämbe könne şaxmat turnirı başlandı häm kiçke yaqta salyut bulaçaq. Şähär matbuğatı da Respublika könenä deputatlar, "Berdäm Rusiä" firqäse, şähär xäkime qotlawları belän genä çiklände. Gäzitlärneñ bersendä genä dä möstäqillek, suverenitet digän süzlär telgä alınmadı. Ä bit şuşı 30 avgust könne 1990 yılğı möstäqillek turındağı deklaratsiä belän bäyle häm suverenlıq töşençäse bötenläy betep kitte diärgä mömkin. Läkin alay uq tügel ikän.

29 avgust könne Milli xäräkätneñ ber törkeme tügäräk östäl artında kiñäytelgän utırış ütkärde. Anda "Milli yort", TİÜ, "Nigez" fondı äğzäläre häm citäkçeläre qatnaştı. Biredä BTK citäkçese Rinat Zakirovqa, "Milli Mäcles" räise İldus Ämirxanovqa, BTİÜ citäkçeläreneñ berse Tälğät Barievqa möräcäğät qabul itelde. Möräcäğättä, alğa taba möstäqillek, milli bäysezlekkä ireşü yulında nindi çaralar ütkärü zarurlığı turında äytelä. Şulay uq, tatar zıyalılarnıñ milli üzañnı üsterü östendä citärlek eşlämäwe äytelde. Milli Mäcles deputatı Faiq Taciev, 30 avgust könenä qarata üz fikeren belderde:

-"Soñğı 3-4 yılda 30 avgust - Ruspublika köne dip ütkärelgän ğämäli çaralarnıñ suverenlıq deklaratsiäse belän urtaqlığı qalmadı. İdäräçel türälär töşençälär almaştırıp, xalıqnıñ añın butıy, anı yalğan qimmätlärgä yunältä. Milli bäysezlek ideyäse Rusiädä demokratik cämğiät xasil bulğaç ta, yañadan tormışqa aşırılaçaq.

Räfis Kaşapov räislegendäge TİÜ dä üzençälekle çara äzerläde. Kiçke säğät 6da Mäydanda ütkäreläçäk bäyräm tamaşaları barışında Tatarstannıñ möstäqillek deklaratsiäseneñ 16 yıllığına bağışlap mäğlümäti piket uzdıru turında belderü yasadılar alar. Monda möstäqillek öçen köräşneñ törle mizgellären surätlägän 700 fotografiäne üz eçenä alğan kürgäzmä quyıla. Älege fotosurätlärdä törle yıllarda Çallıda, Qazanda, Älmättä, Ufada h.b. töbäklärdä ütkärelgän mitinglar, uram yörülär, piketlar taswirlana. Tatarstan möstäqillege öçen imzalar cıyu da oyıştırılırğa mömkin, di ictimaği üzäk räise Räfis Kaşapov.

Ğafiulla Ğaziz, Çallı

XS
SM
MD
LG