Accessibility links

пәнҗешәмбе, 8 декабрь 2016, Казан вакыты 15:08

Mäcit Ğafuri teatrı yaña icat mizgelenä äzerlänä


Tizdän Başqortstan teatrları üzläreneñ yaña icat mizgelen başlap cibärä. Alarnıñ küpçelege tamaşaçılarnı yaña premyeralar belän dä söyenderäçäk. Mäcit Ğafuri isemendäge Başqort däwlät akademiä drama teatrı öçen älege sänğät yılı - 87 nçese. Respublikanıñ iñ ölkän teatrlarınıñ berse bulğan başqort akademteatrı yaña icat mizgelen nindi uy-niätlär belän qarşılıy ikän? Şul xaqta söyläşü öçen, bez teatrnıñ direktorı, rejisser Räis İsmägıylev belän oçraştıq.

“Älege köndä bezneñ öçen iñ qızu çor, - di Räis äfände. – Törki telle teatrlarnıñ Ufada 12 sentäberdä açılaçaq IV xalıqara bäyrämenä soñğı äzerleklär bara. Ä töp icat mizgelen Mäcit Ğafuri teatrı 5 üktäberdä aça”.

İsmägıylev – Bu icat mizgele bezneñ öçen bik üzençälekle başlana. Çönki, mäğlüm buluınça, Ufada 12нче sentäberdä törki telle teatrlarnıñ IV xalıqara festivale başlana. Bezneñ teatr säxnäsendä töp spektakl'lär ütäçäk törle illärdän kilgän teatrlarnıñ. Ä bez üzebez bu festival'gä ike premyera äzerlibez. Berse başqort xalıq eposı buyınça “Ural batır” spektakle, ä ikençese Amerika yazuçısı Kinzinıñ äsäre buyınça “Käkkük oyası östennän” dip atalğan tamaşa.

“Mäcit Ğafuri isemendäge Başqort däwlät akademiä drama teatrı Ufadağı “Tuğanlıq” festivale tämamlanğaç, üzeneñ töp icat mizgelen açuğa äzerlänä başlıy, - di anıñ direktorı Räis İsmägıylev. – Yaña premyeralarnı tağın da şomartu däwam itäçäk. Annan soñ berrättän bik cawaplı gastrol'lärgä äzerlek mäşäqät'läre dä kilep quşıla.

İsmägıylev – Töp icat sezonın bezneñ teatr 5 üktäberdä aça. Tamaşaçılarğa bu könne “Ural batır” eposı buyınça säxnäläşterelgän spektakl' premyerasın täqdim itäbez. Annan inde Sankt-Peterburgqa gastrol'lärgä dä äzerlänäçäkbez. Anda bez 5 köngä barabız. Öç spektaklebezne alıp baraçaqbız. Şulay uq kiläse yılda Mäskäwgä bulaçaq säfärebezgä dä äzerlek başlıybız. Anda bez 450 yıllıq yubiley qısalarında ütäçäk bäyrämdä qatnaşabız.

Xäbärçe: Räis äfände, başqa yıllarda yäş artistlarığız bik küñelle konsert programmaları da äzerli torğan ide. Bıyıl da şundıy uy-niätlär barmı?

İsmägıylev – Andıy niätlär bar. Ölkännär belän dä, yäşlär belän dä äzerlibez. Ölkän buın artistlardan Fidan Gafarov belän Nuriä İrsayıwanıñ ayırım konsertın äzerlibez. Annan Mäskäwdäge Şçepkin uçilişçesında uquçı yäşlärebezneñ konsertı da bulaçaq.

Üzeneñ 87 nçe icat mizgelen açuçı Mäcit Ğafuri isemendäge Başqort däwlät akademiä drama teatrı, anıñ direktorı Räis İsmägıylev äytüençä, bıyılğı sänğät yılında da teatrdağı qayber artistlarnıñ yubiley kiçälären oyıştıru da qaralğan. Monnan tış törle bäyrämnärgä, şul isäptän Ramazan ayı başlanuğa, Qorban Ğayıte bäyrämenä, Yaña yıl kiçäsenä maxsus programmalar da äzerlänäçäk.

Fänis Fätxi, Ufa

XS
SM
MD
LG