Accessibility links

шимбә, 10 декабрь 2016, Казан вакыты 21:45

Tatar kitapları Pekin yärminkäsendä


Bu könnärdä Qıtay başqalası - Pekinda Xalıqara kitap yärminkäse uza. İtaliä, İspaniä, Fransiä, Germaniä, İzrail, Soğud Ğaräpstan häm başqa küp illär belän bergä tanılğan Qıtay yärminkäsendä bıyıl Tatarstan da qatnaştı.

Qıtayda uzğan Rusiä könnäre qısalarında tanılğan Qıtay kitap yärminkäsendä Rusiä maqtawlı qunaq buldı. Pekin yärminkäsendä däräcäle qunaqlar arasında Rusiä premyer-ministrınıñ berençe urınbasarı Dmitriy Medvedev, massaküläm mäğlümat çaraları federal' agentlığınıñ citäkçese Mixail Seslavinskiy, Qıtay respublikasınıñ yuğarı türäläre buldı. Yärminkä eşendä Vasiliy Aksenov, Roman Solnsev, Aleksandr Kabakov kebek tanılğan rus yazuçıları qatnaştı. Tatarstan älege dön'yaküläm tanılğan çarada bıyıl berençe tapqır qatnaşa. Respubliqa kitapları kürgäzmäsen “Tatmediä” agentlığı oyıştırdı. Ä delegatsiä sostavında Tatarstannıñ mädäniät ministrlığı wäkilläre, Tatamediä agentlığınıñ citäkçese urınbasarı Färit Şägiäxmätov, respubliqa kitap näşriätläreneñ citäkçeläre, “Tatarstan” jurnalınıñ baş möxärrire Rifät Fättäxov dä buldı. Alar bu kürgäzmädä Tatarstannı täqdim ittelär.

Yärminkädä törek häm möselman dönyasın täqdim itüçelär öçen tatar telendäge ädäbi kitaplar, tatar mädäniäteneñ tanılğan şäxesläre Gabdulla Tuqay, Musa Cälil, Räşit Vahapov, İlham Şakirov, Baqi Urmançe turındağı kitap-al'bomnar häm şulay uq Qazannıñ meñellığına bağışlanğan kitaplar da zur qızıqsınu uyattı. Barlığı Qıtay yärminkäsendä 200ләп tatar kitabı täqdim itelä. Tatarstannı täqdim itkändä respublikanıñ xalıq artistı Röstäm Malikovnıñ çığışı milli tösmer östäde, di yärminkädä qatnaşuçılar.

Aldan äytkänebezçä, älege yärminkädä Tatarstan berençe tapqır qatnaşa. Moñarçı respublika Germaniädä ütkärelgän Bötendönya kitap yärminkäsendä qatnaşqan ide. Pekin yärminkäse 2 sentäber'gä qädär däwam itäçäk. Anı kön sayın 100 meñnän artıq keşe qarıy. Bıyılğı Rusiägä bağışlanğan kürgäzmä Pekin yärminkäse tarixında iñ zurı bulıp istä qalaçaq.

Al'bina Zäynulla

XS
SM
MD
LG