Accessibility links

якшәмбе, 4 декабрь 2016, Казан вакыты 00:59

Tatar radiosı bäyrämenä meñlägän keşe kilde


Bıyıl Respublika häm Şähär köne uñayınnan oyıştırılğan çaralar ayıruçı törle yünäleştä buldı. Här keşe üzenä qızıqlı bulğan tamaşada qatnaşa aldı. Cırlı, biüle, garmunlı milli çaralar turında bez sezgä inde söylädek, x.t. Bügen alarnıñ başqaları xaqında qısqa ğına bulsa da mäğlümät birep kitik.

Şiğriät söyüçeläre 30 könne köndezge säğät 2dä Ğabdulla Tuqay häykäle yanına cıyıldı. Aldan çarada qatnaşuçılar şağir istälegenä çäçäklär saldılar. Annarı tanılğan häm yäş şağirlär üzläreneñ icatı belän tanıştırdı. Şiğriät bäyrämendä respublikanıñ Yazuçılar berlege räise İlfaq İbrahimov, xalıq şağire Şäwkät Ğäliev, Tuqay isemendäge premiäneñ bıyılğı lawreatları Rabit Batulla, Marsel’ Ğäliev, Rafail Mostafin, Rawil Boxaraev häm başqalar qatnaştı. Bäyrämdä rus häm tatar telendä şiğerlär yañğıradı. Balalar da onıtılmadı. Qazannıñ çerek kül baqçasında alar öçen Qoyaş häm bäxet şähäre isemle bäyräm uzdı.

Sport söyüçeläre öçen köne buyı diärlek törle yarışlar, bäyrämnär ütte. Alar arasında balalar öçen Yuriy Moiseev isemendäge xokkey turnirı, Tübän Qaban küle häm Qazansu yılğasında su sort bäyräme, Kreml’ uramınnan ciñel atletlar yögereşe bar ide. Tağın ber zur çara – federal’ Sport kanalı belän bergälektä oyıştırılğan Sport planetası bäyräme. Anda 50 meñ keşe qatnaştı, dip xäbär itte oyıştıruçılar. Bäyrämgä Mäskäwdän Rusiäneñ tennis federatsiäse räise Şamil Tarpisçev, Rusiäneñ sport buyınça federal’ agentlığı citäkçese Vyaçeslav Fetisov, Sport kanalınıñ alıp baruçıları, tanılğan sportçılar kilde. 30 avgustta ütkän çaralarnıñ iñ qızıqlı häm möhimnäreneñ berse Qazannıñ xalıqara at sportı kompleksında uzdı. Dönya kubogına monda Fransiä, İtaliä, Şvetsiädän kilgän atlar çabıştı. 12 at arasınnan berençe urınına häm 300 meñ yevro külämendäge priznı Fransiädän kilgän Ledi d’Ovresi yawladı. Tatarstan çabışqısı isä bu yarışta iñ soñğı urınnı aldı. Ä menä Tatarstan prezidentı kubogına çabışta respublika Eçke eşlär ministrlığı atı Donbass Millenium ciñep çıqtı. Älege çarada qatnaşuçılar ğına tügel, anı qararğa kilüçe qunaqlar da bik däräcäle ide. Mintimer Şäymiev belän bergä Rusiäneñ Säwdä-iqtisadi palatası räise Yevgeniy Primakov, Möftilär Şurası räise Rawil Ğäynetdin häm başqalar kilde.

Ä 30 avgustta uzğan çaralar belän tanıştırunı kiç köne Kamal teatrı qarşında uzğan tatar radiosınıñ bäyräme belän tämamlarbız. Ul tönge 10ğa qädär bardı häm bik küplärne cälep itte. Oyıştıruçılar süzlärenä qarağanda, anda 20 meñnän artıq keşe qatnaşqan. Çınlap ta, teatr aldındağı mäydan ğına tügel, tirä-yaq uramnar da xalıq belän tulı ide anda. Tatar estradası yoldızların qarap, cırlar tıñlarğa, küñel açırğa monıñ qädär qunaqlarnı cıyuçılar bik siräk äle Qazanda. Härxäldä, Qazan milli-mädäni üzäge aldında şähär filarmoniäse oyıştırğan konsertnı qararğa kilüçelär bik küpkä az ide.

Gölnaz İlgizär

XS
SM
MD
LG