Accessibility links

якшәмбе, 4 декабрь 2016, Казан вакыты 07:04

Törkiädä terror ğämälläre arta


Törkiädä soñğı waqıtlarda kön uzmıy nindi dä ber cirdä bomba şartlaw, yaki pistolet belän keşe üterelde digän xäbär çıqmasın. Töreklär qoral yaratqan xalıq. Polistiä citäkçelegeneñ mäğlümätlärenä kürä räsmi räweştä terkälgän 600 meñ tiräsendä pistolet häm mıltıq keşe qulında. Terkälmägän qorallarnıñ sanı isä 6 million tiräsendä, dimäk çağıştırmaça här 40 Törek watandaşınnan bereneñ qulında qoral bar. Döres bu aralar yalğışıp ta yaki belä torıp ta keşelärne cäräxätläw yaki üterü waqiğäläre ğädäti küreneş. Bolardan tik tuylarda hawağa ut açqanda yalğışıp qunaqlardan beren, qayber oçraqlarda üz-üzen atıp üterüçelärgä reaksiä arta başladı.

Ämma iñ köçle reaksiä şiksez idän astı oyışmalarnıñ, bigräk tä PKK yaki anıñ sempartizannarınıñ soñğı atnalarda artqan teror xäräkätlärenä kürsätelä. Bu atnada Antalyadağı şartlawda öç keşe ülgän, 87 keşe yaralanğan, şulay uq Marmarisnıñ öç ayrım urnındağı şartlawda da 21 keşe cärxätlängän ide. Şulay uq Märsindä bombalar arqılı ber keşe, İstanbulda isä 6 keşe yaralandı. BBC-neñ analizına kürä, PKK-nıñ Ğiraqtağı liderı Murat Karayılan Ankarağa atışlarnı tuqtau täqdime yasağan, ämma monıñ öçen dä Törkiädän säyäsi häm xärbi taşlamalar taläp itkän.

Tege yaqtan Ankara belän Washington arasındağı kileşü nigezndä AQŞ PKK belän köräş öçen mäxsüs wäkil bilgeläde. Ul pensiädäge general Joseph Ralston, Törek yağı bu wäkil belän qänäğät. Ğiraqtağı Kördistan Demokratiä Partiäse liderı Mesut Barzani isä mäxsüs wäkilneñ borınğı ber xärbi şäxes buluwı belän qänäğät tügel ikän. Läkin PKK üzen räsmi räweştä tanuğa iltäçäk bu adım belän bik riza.

Şundıy täräqiätlär barğanda Törek xalqında PKK-ğa häm ayrım alğanda Kördlärgä qarata tiskäre reaksiä köçäyä bara. Konya şähäreneñ Bozkır qasabasında 25 körd eşçese çıqqan ber ğawğa-tartış näticäsendä meñ xätle keşe tarafınnan linç itelergä, yäğni sudsız-nisez üterelergä telände. Polistiä bik awırlıq belän şuşı Körd eşçelären qotqarıp, alarnı şähär çitenä cibärde. Şundıy uq ber waqiğä İstanbulda 30 August Ciñü Bäyräme uñayı belän ütkärelgän parat waqtında bula yazdı. Parad barğanda 4 yäşüsmer “Livanğa Törek Ğäskäre Cibärelmäsen” digän plakat kütärergä telägännär, läkin tirä yaqtağı xalıq alarnı PKK öçen propganda yasarğa mataşalar dip çaq qına üterä yazdı.

Tabiği, Törkiädä ike turistik üzäktä bombalar şartlağaç çit il mätbuğatı da zarar üsäçäk digän analizlar yasıy başladılar. İngliz gazetası Times “soñğı terrostik xöçemnär elekkelärdän küberäk qurqınıç tudıraçaq” dip yazıp çıqtı.

Äxtäm İbrahim, İstanbul
XS
SM
MD
LG