Accessibility links

чәршәмбе, 7 декабрь 2016, Казан вакыты 11:55

Tatar qızı Mäskäwgä, Galina Vişnevskaya mäktäbenä uqırğa kerde


Bu könnärdä Sverdlovski ölkäseneñ Kamensk-Ural'skiy şähärendä tuıp üskän tatar qızı Güzäl Şaxmatovanı yaqınnarı, tuğannarı, dusları Mäskäwgä, Ğalina Vişnevsqaya mäktäbenä uqırğa ozattılar.

Güzäl Şaxmatova Ural tatar zıyalıları arasında tanış şäxes. Musorgskiy isemendäge Sverdlovski däwlät konservatoriäseneñ vokal bülegendä belem alğan waqıtta uq, Güzäl tatar milli ictimaği çaralarda yış qatnaştı. Bigräk tä Tatarstannıñ Uraldağı daimi wäkillege tarafınnan uzdırılğan çaralarda ul kötep alğan qunaq buldı. Üzeneñ bärxettäy yomşaq, üzençälekle tawışı belän tıñlawçılarnı äsir itä belgän tatar qızınıñ repertuarında dön'yaküläm tanılğan dahi kompozitorlar äsärläre dä, üzebezneñ tatar romansları da küp. Bigräk tä Röstäm Yäxin äsärlären yaratıp başqara Güzäl.

Konservatoriäne uñışlı tämamlağannan soñ, Güzäl Mäskäwgä, Ğalina Vişnevsqaya mäktäbenä barıp, yazmışın sınap qararğa uylağan ide. Güzälneñ änise Firüzä xanım äytüençä, bäyge bik zur bulğan, altmış bala arasınnan nibarı unber keşene saylap alğannar, alar arasında Güzäl dä bar.

Firüzä xanım söyläwençä, öçençe balasın tudırğanda ğailä başlığı, Güzälneñ ätise kisäk qatı awırıp kitep, invalid bulıp qalğan. İşle ğailädä üskän olı qız Güzälne bik irkälärgä turı kilmägän. Baqçada üze üstergän ukropnı satıp, ipigä aqça eşläp üskän qızım ul, di Firüzä xanım. Öç balanı üsterep, uqıtıp keşe itär öçen äni keşegä dä köne-töne eşlärgä turı kilgän. Süz uñayınnan äytep ütik, elek şäfqät tutaşı bulıp eşlägän Firüzä inde küp yıllar buyı massajist hönären üzläşterep, üzeneñ qul häm küñel cılısı belän keşelärgä sälämätleklären qaytara, yaqın-tirädä anı belmägän keşe yuq. İgelekle, tärtiple balalar üstergän öçen dä bik xörmät itälär anı belgän keşelär. Balalarım, şöker, täwfiqlı da, sabır da di Firüzä xanım. Olı qızım Güzäliä Mäskäwdä dä üzebezneñ tatarlarnı tabıp, yaxşı keşelär belän aralaşıp yäşäsen ide di ul. “Keçkenädän ük tatar xalqın yaratıp, xörmät itep üste, inde tağın da telen onıtmas, xalqına xezmät itär, - di ana, - xalıqnı üz tawışı belän quandırsın, anı yaratsınnar, kötep alsınnar ide dip telim”.

Tatar qızı Güzäl Şaxmatova zur icat yulına ayaq bastı. İptäşläre, yaqınnarı, tuğannarı anı zur uñışlar, aq yul teläp ozatıp qaldılar.

Fäwiä Safiullina, Yekaterinburg

XS
SM
MD
LG