Accessibility links

җомга, 9 декабрь 2016, Казан вакыты 08:55

Yaña uqu yılına yaña mäktäplär


Başqortstanda bügen barlıq säyäsi, ictimağıy häm mädäni çaralar yaña uqu yılı başlanu, Belem köne bäyräme belän bäyle. Respubliknıñ barlıq yuğarı citäkçeläre näq menä şuşı tantanalı çaralarda qatnaştı, yaña mäktäplär açu belän mäşğül buldı.

Bıyıl Başqorsttan buyınça cämğıse 29 yaña mäktäp häm gimnaziä üz işeklären açtı. Şularnıñ dürtese – Ufada. Ufadağı 65 nçe sanlı tatar gimnaziäse uqıtuçıları häm uquçıları öçen dä şatlıqlı kön bu. Biredä ör-yaña ike yanqorma tözelep bette häm elekke bina baştanayaq yañartıp qorıldı. Bik qısan şartlarda uquçı tatar balalarınıñ ata-anaları häm tatar cämägätçelege 65 nçe sanlı tatar gimnaziäsenä yaña yanqormalar tözü kiräklege turında respublik citäkçelegenä möräcägätlär belän berniçä tapqır çıqqan ide. Nihäyät, 2003 yıl azağında biredä yaña binalar tözü turında qarar qabul itelde. Başqortstan prezidentlığına öçençe möddätkä saylanuçı Mortaza Räximov şulay wäğdä birde. Älbättä, ul binalarnı ber yıl eçendä ük tözep betärgä uylağannar ide. Ämma, finanslar bülenmäw säbäple, öç yılğa yaqın suzıldı bu eş. Ni bulsa da buldı, yaña binalar tözelep bette häm alarnı tantanalı açu öçen 1 sentäbr könne biregä prezident Mortaza Räximov citäkçelegendä yuğarı türälär kilde. Bu könne Mortaza Räximov başqa mäktäplärne açuda qatnaşsa da, berençe bulıp irtän irtük tatar gimnaziäsenä kilde. Milli küzlektän qarağanda, bu ğämäl yaxşı fal bularaq qabul itelä.

Ufadağı 65nçe sanlı tatar gimnaziäsendä xäzer 500 bala belem alaçaq. Anda sälätle balalarnıñ mömkinleklären tulısınça açu öçen dä şartlar artqan xäzer. Törle tügäräklär öçen bülmälär, xoreoğrafiä zalı, sport zalı häm aşxanä üz işeklären açtı bügen biredä. Gimnaziäneñ direktorı urınbasarı Gölnar Zinnätullina süzlärençä, niçä yıllar xıyal itkän mömkinleklär tudırıldı xäzer:

"Bezneñ mömkinleklär arttı biredä. Sport zalı, aşxanä, balalarğa xezmät bülmäläre. Bolar barısı da balalarnıñ sälätlären tulıraq açarğa şartlar tudıra."

Ufanıñ 65 nçe sanlı tatar gimnaziäse direktorı urınbasarı Gölnar Zinnätullina äytüençä, bıyılğı uqu yılına biredä uquçılarğa yaxşı belem alu öçen törle qäbinetlar da cihazlandırılğan, yaña kompyuterlar da, başqa texnik da alınğan.

65 nçe tatar gimnaziäsen açu tantanasında qatnaşqannan soñ, respublik prezidentı Mortaza Räximov Ufada tağın da 27 nçe urta mäktäpne, Fatıyma Mostafina isemendäge 20 nçe sanlı gimnaziäne häm Rämi Ğäripov isemendäge respublika gimnaziäse binaların açu tantanalarında qatnaştı. Ä inde prezident citäkçelegendä bäyräm çaralarında yörgän wäkillekneñ soñğı baru urını – Ufanıñ ör-yaña belem uçağı – 158 nçe sanlı başqort gimnaziäse buldı. Bu bina üze dä Ufanıñ ör-yaña bistäsendä – Könyäk mikrorayonında tözelde. Başqort gimnaziäse üzeneñ zurlığı häm maturlığı belän şaqqattıra. Respublik citäkçelege qararı belän bu gimnaziägä tanılğan şağir Mostay Kärimneñ iseme birelde. Bügenge byäräm çaralarına – gimnaziäne açu tantanasına Mostay Kärimneñ Ufada yäşäwçe qızı Älfiä häm Mäskäwdä ğömer itüçe ulı İlgiz dä kilgän ide. Älfiä xanım bu tantanada çığış yasap, respublik citäkçelegenä Mostay Kärimneñ istälegen mäñgeläşterü täñgälendä başqarğan eşläre öçen räxmätlären äytte. Ber yıl yarımda tözelep betkän bu gimnaziädä kiläçäktä çın başqort ruxlı balalar tärbiälärgä niätlilär. 1 meñgä yaqın balanı uqıtuğa isäplängän gimnaziägä äle berençe sıynıfqa yözgä yaqın bala kilgän. Ä cämğıse bügenge köndä nibarı 200dän artıq qına bala uqırğa kilde biregä. Ä uqıtuçılar sanı 175 kä citä. Yağni mäsälän, ber uquçığa ber uqıtuçı turı kilä disäñ dä yarıy. Älbättä, kiläse yıllarda gimnaziä citäkçeläre häm mäğärif ministrlığı türäläre biredä balalar sanı artır dip ömetlänä. Läkin monıñ öçen başqort milläteneñ demoğrafik xälendä kisken alğa kiteş, şartlaw bulırğa tieşter, möğayın.

XS
SM
MD
LG