Accessibility links

якшәмбе, 4 декабрь 2016, Казан вакыты 23:35

Semberdä tatar mäktäbe açıldı


Ber ük binada elekke 64-nçe häm ör yaña 91-nçe mäktäp urnaşqanğa, 9 säğättä elekke xucalar Belem köne bäyräme uzdırdılar. Tatar balaları 11 säğätkä genä cıyıldılar. Bäyräm aldınnan yaña mäktäp direktorı Älfiä Abutdinovadan häm ana tele uqıtuçısı Zöhrä Xäbibullinadan käyeflären soraştıq. Älfiä xanım bik şat, iñ qıyını artta, Allah boyırsa, kiläse yılda balalar cıyu mäsäläse ciñel çişeläçäk, balalar baqçasında 1-sıynıf öçen balalar bügen ük äzerlänälär.

Köne-töne cäy buyı şuşı mäktäpne buldıruğa böten waqıtın sarıf itkän Zöhrä xanım äytüençä, ul şatlığınnan räxätlänep utırıp yılağan: şöker, iñ zur awırlıqlar artta qaldı, di ul. İkençe sıynıfqa uqırğa kilgän Qamil Zıyätdinov ta şatlana: biredä ana telendä dä uqırğa öyräterlär, di ul.

Bäyräm tantanası ana telenä bağışlanğan bik tä kürkäm cır häm Tatarstan gimnınnan başlandı. Sember qalasında uzğantantanada Tatarstan gimnı! Bu şatlıqlı waqiğa, ämma aptırarğa urın yuq: ägär ilbaşı Şäymiewneñ abruyı cirle citäkçelek öçen bik yuğarı buluı häm bu mäktäp açıluğa da näq Tatarstannıñ oluğ yärdäme monı nigezli dä.

Bäyrämne alıp baruçı, Belem köne belän täbriklägännän soñ, Beslan faciğaseneñ 2 yıllığına bağışlap, ber minutlıq tınlıq iğlan itte, annan soñ citäkçe qunaqlar belän tanıştırdı. Alar arasında gubenatornıñ milli häm dini mäs'älär buyınça kiñäşçese, şähär häm rayon mäğärif idaräläre başlıqları, İdelaryäğı rayonı başlığınıñ soutsila' mäs'älälär buyınça urınbasarı bar ide. Alar üzläreneñ çığışlarında ölkä başlığına räxmät äyttelär, moña qadär dä tatar tele turında qayğırtuların assızıqladılar, yaña ğına tuğan mäktäpkä uñışlar telädelär.

Ölkä avtonomiäse räise Ramis Safin moña qadär başqa ölkälärdä ayırım tatar mäktäbe bulıp ta, bezdä bulmağanına uñaysızlıq xisläre kiçergänen äytte häm, bergäläp totınsaq, şuşı mäktäpne dä tirä-yaq töbäklärdä tanıta alırbız, dide. Ul avtonomiä isemennän berençe sıynıfqa kilgän nänilärgä uqu äsbapları belän tutırılğan paketlar tapşırdı. Ä şuşı mäktäpkä berençe bulıp ğariza kitergän 1-sıynıf uquçısı Zilä Möxämmätşinağa Qazan mäğärif idaräse başlığı İldar Galävetldinov birgän “Ensiklopediä şkol'niqa” digän kitap büläk itte. Şul uq İldar äfände cibärgän “Tatariqa” kitabın isä rayon avtonomiäse räise Rafail Näcmetdinov mäktäp direktorı Älfiä xanımğa tapşırdı. Rafail mäktäpkä 150 bala cıyılıuına şatlanuın äytep, yaña yılğa qadär alarnıñ sanı 220гә citär, digän ışanıç belderde. Läkin monıñ öçen ciñ sızğanıp eşlärgä kiräk, dide ul. “Sember” isemle maltabarlar berlege räise Färit Äyupov Pedagogiä universitetında tatar filologiäse bülekçäse talibäläre arasında iñ yaxşı uquçılarnı yıl sayın büläkläwläre häm biredä dä şundıy ğamälne tormışqa quyaçağın belderde. Yaz köne kilerbez büläklär belän, dide.

Ölkännärdän soñ uquçılarğa süz birelde. Ölkänräkläre säxnädän berençe sıynıf nänilären şiğırlär belän sıyladılar, yaxşı uqırğa, tärtiple bulırğa öndädelär. Nänilär dä äzerlänep kilgännär: härberse şiğır yatlap kilgän. Tik nibarı ikese genä tatarça şiğır äzerlägännär, qalğannarı – urısça. Yarıy, didelär qatnaşuçılar, mäktäp alarnı da ana telenä yaqınayta alır. Bäyrämnän soñ sıynıflar citäkçeläre üz uquçıları belän ayırım bülmälärdä cıyılıp tanıştılar. Balalarğa mäktäptä kerteläçäk yañalıqlar turında täfsilläp söylädelär, kemneñ nindi eşkä häwäslegen açıqladılar.

Ayrat İbrahim, Sember

XS
SM
MD
LG