Accessibility links

якшәмбе, 4 декабрь 2016, Казан вакыты 09:16

Tatarstanda Grajdannarnı saqlaw aylığı başlandı


Tatarstannıñ Ğädättän tış xällär ministrlığı xäbär itkänçä, 4 sentäberdän Tatarstan külämendä grajdannarnı saqlaw aylığı başlanıp kitte. Älege çara xalıqqa tormışta bulırğa mömkin qurqınıç xällär häm alardan saqlanu alımnarı turında mäğlümat citkerü maqsatlarında ütkärelä dip xäbär itelde. İldä xalıqqa nindi qurqınıç yanıy ala, keşelärne ul bälälärdän niçek qotqarırğa uylıylar, monıñ öçen xalıqnı närsägä öyrätälär? Bu sorawlarğa Ğädättän tış xällär ministrlığınıñ matbuğat xezmäte citäkçese Radıgin Andrey cawap birä.

Grajdannar oboronası citäkçese, Tatarstannıñ premyer-ministrı Röstäm Miñlexanov boyırığı nigezendä 4 sentäberdän 4 oktäbergä qädär grajdannarnı saqlaw aylığı uzaçaq. Anıñ maqsatı – respublikada bulırğa mömkin häläkätlär turında söyläw, qurqınıç xällärdä üzeñne niçek totu, alardan saqlanu häm ber-bereñä yärdäm kürsätü yulları belän tanıştıru. Ä iñ möhime – xalıqqa saqlanu yullarınıñ täcribäsen häm näticälegen isbatlaw häm keşelärgä qurqu häm panikanı beterü mömkinleklärenä öyrätü. Şuña kürä älege aylıq qısalarında respublika uqu yortlarında “qurqınıçsızlıq könnäre”n uzdıru niätlänä. Oyışmalarda Tatarstan grajdannar oboronası citäkçeläre, veterannar, häläkätlär häm tabiği afätlärne beterüdä qatnaşuçılar belän oçraşular bulır dip kötelä.

Tınıç waqıtta bulırğa mömkin häläkätlär turında söylägändä, matdi yuğaltular, ülem näticäläre buyınça, berençe urında yanğınnar tora. Xalıq älege yanğınnarnı buldırmas oçraqların belergä, bulğan oçraqta, alardan saqlanu ısulların öyränergä tieş. İkençedän, älege aylıqta hawağa ağulı matdälär çığaru qurqınıçı tudırğan avariälär, törle cimerelülär turında ğına tügel, ä tabiğät bälä-qazaları turında da söylänäçäk. Monnan qala xalıqqa könküreştä, eştä bulırğa mömkin bälälär, yul häläkätläre häm başqa qurqınıç xällär turında da añlatılır dip kötelä.

Andrey Radıgin süzlärenä qarağanda, älege çara berençe tapqır ğına uzmıy. Ä uqu yortlarında Qurqınıçsızlıq könnäre yartı yılğa ber taqır bulsa da oyıştırılırğa tieş ikän. Ä Qazan xalqı bu grajdannarnı saqlaw aylığı turında xäbärdar mikän? Älege çarağa alar niçek qarıylar?

Yuq, monıñ närsä ikänen dä belmim, işetkänem dä yuq.

İşetkänem dä yuq, ışanıp ta betä almıym andıy närsäneñ buluına.

Yuq, bügenge köngä qädär monıñ turında bernärsä dä işetkänem bulmadı.

İşetkänem yuq, närsä soñ ul?

Xalıqnıñ älege çara turında fikerläre şundıyraq. Ä tormışta bulğan bälälär, macaralar turında televidenie kön dä söyläp häm kürsätep tora. Tamaşaçı anı mawığıp qarıy. Andıy tapşırular iñ yuğarı reytingnı cıya. Ä andıy oçraqlardan niçek qotılırğa, bäläne niçek buldırmasqa – monısı turında uylawçılar bik az. Çit illärdä häläkät waqıtında 911 telefonı belän şaltıratsalar, Rusiädä 01, 02, 03, 04 sannarın cıyıp, yanğın sünderüçelärgä, militsiä, aşığıç yärdäm, gaz xezmätenä xäbär itälär. Bu aylıqta qaysı nomer buyınça şaltıratırğa soñ?

Güzäl Zıyätdinova

XS
SM
MD
LG