Accessibility links

дүшәмбе, 5 декабрь 2016, Казан вакыты 05:31

Kondopoga: urıslar çeçennarnı şähärdän quırğa taläp itä


Karel respublikasınıñ Kondopoga şähärendä urıs millätennän bulğan cirle xalıq belän Kavkazdan kilgän eşquarlar arasında inde berniçä kön çualışlar bara, kilgän xäbärlärgä qarağanda, ülüçelär dä bar. Atna axırında urıs yäşüsmerläre çeçennar totqan kibetkä ut törtän, alarnı şähärdän quırğa taläp itkän.

Uzğan sişämbe Kondopogada, xujası çeçen keşese bulğan Çayka kafesında ber törkem urıs yäşüsmere belän çeçennar arasında ızğış qupqan. Suğışu näticäsendä, törle mäglümätlärgä qarağanda, 2dän alıp 4kä qädär keşe ülgän. 1-2 sintäber könnärendä yarsığan üsmerlär millätçel şiğärlär qıçqırıp şuşı kafeğa häm çeçennar totqan başqa säwdä urınnarına ut törtkän, täräzlärenä taşlar atqan. Çualışlar militsiä kilgänçe däwam itkän. 100dän artıq keşe qulğa alınğan. Yäkşämbedä 2 meñläp keşe mäydanğa çığıp şähärne çeçennar häm başqa "kilmeşäklärdän" çistartırğa taläp itkän.

Mäskäwdäge xoquq yaqlawçı Sova törkeme citäkçese Aleksandr Verxovski süzlärençä, çualışlar uzğan töndä dä däwam itkän. "Çualışlar uzğan töndä dä däwam itte, azraq külämdä bulsa da. Çayka kafesın tağın yandırırğa tırıştılar, gärçä ul inde yanğan bulsa da. Bu yulı utnı tiz sünderdelär. Tağın närsäneder yandırğannar. OMON cıyılğan keşelärne quıp tarattı" di Sova törkeme citäkçese.

Verxovski süzlärençä, höcümçelär arasında, küp bulmasa da, miilätçel törkem äzğaları bulğan, xärxäldä Mäskäw, Petrozavodskidan kilgännär.

Soñğı 10-15 yılda Karel respublikasına Kavkaz yaqlarınnan, şul isäptän Çeçnädän, şaqtıy küp keşe küçep kilgän. Başqala Petrozavodski, Kostomukşa, Kondopogada alar mäxällä bulıp yäşi. Millät-ara näfrätkä nigezlängän çualışlar monda elegräk tä bulğalağan. Tik räsmilär moñarçı alarğa millät-ara näfrät tügel ä ğädäti ızğış dip qarağan.

Kareliädä bulğan xällärgä bügen Çeçnä premier-ministrı Ramzan Qadırov ta süzen äytte. Monıñ öçen ul cirle citäkçelärne ğäyepläde häm alarnıñ qullarınnan kilmäsä tärtipne anda üze uranştıraçağın äytte. Qadırov süzlärençä, militsiä kafeda isereklärneñ suğışuın başınnan uq küzätep torğan, läkin ber çarada kürmägän.

Monıñ belän xoquq yaqalwçı Aleksandr Verxovski da kileşä. "Bu töndä ni bulır, qararbız, bälki tınıçraq bulır, xäzer anda östämä militsiä köçläre kiterelde. İñ möxime, höcümçelär küpmeder maqsatına ireşte, xalıq cıyını qabul itkän qararlarnı cirle xakimiät xupladı" di Sova törkeme citäkçese.

Verxovski süzlärençä, şähär räsmiläre Çayka kafesın anıñ çeçen xujasınnan tartıp alırğa qarar itkän. Çığışı belän Kavkazdan bulğan bar keşelärneñ dokumentları tikşereläçäk, alar tärtiptä tügel dip tabılsa, bu keşelär şähärdän quılaçaq. İxtimal alarnıñ kübesenä kitergä turı kiläçäk, di belgeç.

Ali Ğilmi
XS
SM
MD
LG