Bıyıl Peterburgta 1 sentäber 340 meñ bala öçen belem bäyräme buldı.34 meñ bala berençe tapqır mäktäp busağasın atlap ütte.Berençe sıynıf uquçıları öçen Ledovıy sarayında şähär zur bäyräm oyıştırğan ide.Gubernator Valentina Matvienkonıñ qotlawınnan soñ nänilär bik qızıqlı sirk häm konsert programması qaradılar.Mixail Boyarskiy, İğor Kornelyuk kebek ölkän yäştäge häm yäş yoldızlar qatnaşlığında."Berdäm Rusiä" balalarğa firmennıy bülägen äzerlägän ide :nänilärgä bik kiräkle närsä- matur köndälek häm flomasterlar.Bu bäyrämne äzerläwdä häm ütkärüdä şaqtıy öleşen bezneñ millättäşlärebez täşkil itkän "Smeşariklar" mul'tfil'mınıñ icat törkeme dä äwzem qatnaştı, çaqıru biletlarına da smeşarik uyınçıqları berketelgän ide. Rusiä balalarınıñ yaratqan mul'tigına äylängän "Smeşariklarnıñ" art-direktorı Salawat Şäyxinurov aldağı tapşırularıbıznıñ bersendä bu xaqta täfsilläbräk söylär äle.
Äytergä kiräk, yaña uqu yılına Peterburgta barı ber genä yaña mäktäp safqa kertelgän ide: Primorskiy rayonda 340 uquçılıq 246 nçı mäktäp.Mömkinçelekläre çiklängän balalar öçen Kirov rayonındağı ber PTU binasın zamança cihazlandırılğan maxsus mäktäpkä äyländerdelär .Ä inde iske mäktäplär ata-analar xisabına, yäğni "üz irekläre belän birelä torğan vznos"qa tözekländerelde. Bu kertem härber ata- ana öçen 400 sumlap, annan tış mäktäp kiräk-yaraqlarına aylıq cıyım 700 sumlap. Balanıñ üzen mäktäpkä cıyar öçen 4 meñläp kiräk. Kiläse uqu yılında"Mäktäplärdä kapremont ütkärü" programması eşli başlayaçaq, ata-analarğa , bälki, beraz ciñellek kiler
Qızğanıçqa qarşı, bıyıl da tatar mäktäbe, mäktäp tügel, böten şähär öçen ber tatar sıynıfı da aça almadıq.Yel buyı söyläşülär alıp barılsa da , şähär üzägendäge "Çernışevskaya" metro stansiäse yanında, qayçandır prezident Putin uqığan mäktäptä urın tabılsa da, ul mäktäp uqıtuçıları Qazanda metodik äzerlek alıp qaytsa da, sıynıf açar öçen barlığı 15 bala ğına cıyarğa kiräk bulsa da, ul 15 bala älegä tabılmadı.Säbäbe nidä ikänlege turında bez "Tatarskaya obşçina Sankt-Peterburğa" isemle yaña ictimaği oyışmanıñ räise Räşit Mähdiev söyli:
“Obyektiv säbäbe:beraz soñladıq , balaların yaratuçı ata-ana öç yıl aldan mäktäpne beleşep, söyläşep quya.Bu berençedän.İkençe säbäp xalqıbıznıñ cawaplı, şunıñ arqasında konservativ buluında mäktäpneñ nindi östenlekläre bar ikänen belmi torıp,tatar tele bulğan öçen genä balaların şähärneñ ber başınnan ikençesenä yörtergä aşıqmawında. Subyektiv säbäp- informatsiä citmäwdä. "Nur" gäzite çığudan tuqtap tora, radio- televidenie belän mäs'älä ele xäl itelmägän. Ämma bu problema, hiçşiksez xäl iteläçäk , söyläşülär inde alıp barıla”
Peterburg ta Tatarstan respublikası könen bäyräm itte 30 avgustta Peterburgta yaña matur traditsiägä nigez salındı: tatar cämäğätçelege Respublika könen böyräm itte."Sankt-Peterburg tatar cämğiäte"(rusçası"Tatarsqaya obşçina Sankt Peterburğa i Leningradskoy oblasti") oyıştırğan bäyräm Petrograd yağında Tuqay häykäle yanında uzdı.İdeya häm bäyräm ssenariy avtorı Älfiä Räxmätullinağa süz birik:
“Tuqay berüze bulırğa tieş tügel, dip uylap yöri idem, ideya şulay kilde "Sankt-Peterburg tatar cämğiäte ideyänı xupladı.Konservatoriä studentı Al'bert Xätmullinğa "Tuğan tel", "Tatarstan gimnı"notaların birdem, ul öyränep , Tuqay häykäle yanında alarnı uynadı .Bar xalıq, aña quşılıp, "Tuğan telne"cırladı. Çäçäklär bik küp ide , Tuqaynı çäçäklärgä kümdek. Annarı tağın şul:tatar yäşläre üzläreneñ iñ bäxetle könnärendä, nikaxların terkägäç, Marsovo poleğa tügel, ä Tuqay yanına kilälär ” Mädäniät ministrı Zilä Wälieva iyün ayında Tuqayğa häykäl açarğa kilgäç: "Tuqay Peterburg tatarlarınıñ qiblası bulaçaq", -digän ide, süzläre xaq bulırğa oxşağan: häykäl yanında "Tuqay uquları" häm başqa mädäni çaralar uzdıru da planlaştırıla.
Gölzadä Kamalova, Sankt-Peterburg
